Deconfinement "D'Schoulrentrée ass net fräiwëlleg"

De Bäitrag vum Rick Mertens lauschteren

Den Educatiounsminister äntwert dorop, d'Schoulrentrée wier net fräiwëlleg: D'Decisioun, wéini et nees sécher ass fir an d'Schoul ze goen, géif bei der Regierung leien, an net bei den Elteren an de Schüler.

4 vun 1.000 Schüler sinn infizéiert

Nodeems de physeschen Unterrecht siwe Wochen ënnerbrach war, sinn d'Ofschlossklassen haut déi éischt, déi nees an d'Schoul ginn. Virun der Rentrée haten d'Schüler d'lescht Woch d'Méiglechkeet getest ze ginn - ronn 40 Prozent vun de Primaner hätten dat och gemaach, esou de Claude Meisch.

Hien hätt sech awer eng méi breet Participatioun erwaart, mee et géif ee gesinn, datt de Virus do just minimal verbreet wier. Op dausend Schüler wieren der véier positiv getest ginn, esou de Claude Meisch.

Tracking an der Schoul

Wa Schüler sech mam Coronavirus ustiechen, gëtt dee selwechten Tracking gemaach, wéi bei anere Leit. D'Santé géif sech dorëms këmmeren, net den Educatiounsministère, esou de Claude Meisch. Ob d'ganz Klass da muss doheem bleiwen, misst cas par cas decidéiert ginn.

"Da gëtt gekuckt: mat wiem war deen dote Schüler, oder deen doten Enseignant an deene leschte Wochen a Kontakt. An da ginn déi Leit getest, an da gëtt festgestallt, ob si mussen a Quarantän goen, oder ob si dann awer erëm direkt kënnen an d'Schoul, an hiert privat Liewen normal féieren."

Anescht wéi um Ufank vun der Kris misst awer net méi déi ganz Schoul zoumaachen, wann ee Schüler positiv getest gëtt, esou de Claude Meisch.

Dat Wichtegst vum Schoulprogramm fäerdeg kréien

Bis d'grouss Vakanz ass et net méi laang. Duerch d'Ënnerbriechung duerch d'Corona-Kris wier et awer net méiglech fir de Programm op den ënnerschiddleche Klasse fäerdeg ze kréien. Déi lescht Woche géifen och net duergoe fir alles nozehuelen, wat virdrun net konnt gemaach ginn. Dat wier awer och net d'Ambitioun gewiescht, seet de Claude Meisch.

"Mir hu viru Woche scho gesot: mir musse kucken, datt mer definéieren, wat dat Wichtegst ass, dat Essentiellt, dat mer an dësem Schouljoer nach musse maachen - a wat ënner dëse schwieregen Ëmstänn och nach ka gemaach ginn."

Dat géif fir den Apprentissage à distance gëllen, mee och fir de Presenzunterrecht gëllen. Et kéint een awer och nach "déi eng oder aner Prüfung maachen", fir ze decidéieren, wien d'Joer gepackt huet a wie vläicht net. "Mee mir wëssen, datt mer elo natierlech net alles kënne maachen, dat op engem normale Léierplang steet." Et géif een den Enseignante am Secondaire vertrauen, "datt si elo nach dat Wichtegst maachen, dat de Schüler brauch, fir am September erëm unzefänken".

No siwe Woche sinn d'Premières-Schüler de Moien nees an d'Schoul gaangen. D'Nächst Woch ass et dann och un deenen anere Lycéesschüler, an de 25. Mee un de Grondschüler.