Sozialwahlen 2019 D'Personaldelegatiounen ënner der Lupp

Wéi ee Profil hunn d'Personaldelegatiounen an de Betriber - a wat maachen d'Delegéiert eigentlech konkret? Déi Froe goufen hei am Land bis ewell just an enger wëssenschaftlecher Etüd ënner d'Lupp geholl. An zwar vum Institut fir sozio-ekonomesch Fuerschung LISER. Eng Conclusioun: de Sozialdialog an de Betriber gëtt vu Männer dominéiert.

Pia Oppel / cbi

Carole Blond-Hanten
D'Soziologin Carole Blond-Hanten huet um LISER d'Personaldelegatiounen erfuerscht. Foto: LISER.

Fir et zouzespëtzen: Den "typesche" President vun enger Personaldelegatioun ass ee Fransous vu mëttlerem Alter, deen hei am Land wunnt, scho méi laang fir seng Entreprise schafft an net an enger Gewerkschaft ass. D'Carole Blond-Hanten, Soziologin beim LISER, seet, datt dräi Véierel vun de Presidente vun de Personaldelegatioune Männer sinn, a just ee Véierel wiere Fraen:

"70 Prozent vun de Presidenten hu méi wéi 40 Joer. D'Nationalitéit, do sinn d'Fransousen op der éischter Plaz, d'Lëtzebuerger op der zweeter Plaz, drëtt Plaz sinn d'Belsch, véiert sinn d'Däitsch a fënneft d'Portugisen. An et sinn e bëssi manner wéi d'Hallschent, déi gewerkschaftlech engagéiert sinn: 47 Prozent an 53 Prozent."

Och an anere Länner wieren d'Frae manner präsent an den Decisiounsgremie vu Betriber wéi d'Männer. Den Desequiliber ass der Fuerscherin no zu Lëtzebuerg awer besonnesch markant. Dozou passt, datt bei de Wahle fir d'Salariatskammer männlech Kandidate mat 70 Prozent staark iwwerrepresentéiert sinn. Am mannste Frae kandidéiere beim Landesverband (17 Prozent), am meeschte beim LCGB (36 Prozent). D'Kandidatelëschte fir d'Delegatiounswahle sinn eréischt nom 25. Februar definitiv.

Männer maache méi liicht Carrière

D'Thema Gläichberechtegung spillt der LISER-Etüd (D'Etüd ass net public. D'Carole Blond-Hanten veschafft se an hirer Dokteraarbecht) no an der Aarbecht vun de Personaldelegatiounen iwwerdeems keng grouss Roll. Dobäi géifen et konkret Defie ginn, seet d'Carole Blond-Hanten. Zum Beispill wann et ëm d'Carrièrë geet. Männer kéinten nach ëmmer méi liicht Carrière maachen, well "awer nach ëmmer méi Fraen zum Beispill ganz banal Congé parantal huelen."

Frae géifen och méi dacks Deelzäit schaffen, präziséiert d'Soziologin. Et géif hei Bedarf ginn, dëst "emol a Fro ze stellen", seet si.

Der Enquête no wieren d'Haaptthemen, ëm déi sech d'Delegéiert këmmere wëllen, d'Gesondheet a Sécherheet op der Aarbechtsplaz, d'Aarbechtskonditiounen oder och Mëssverständnesser mat de Virgesetzten. "Bei de kollektive Revendicatioune sinn och d'Aarbechtszäiten an d'Klima an den Aarbechtsverhältnisser, déi ervirgestrach gi sinn", seet d'Carole Blond-Hanten.

Net all Betrib huet eng Delegatioun

All dës Resultater ginn aus enger Enquête ervir, déi de LISER 2013 gemaach huet. Ugeschriwwe goufen 2.800 Entreprisen, déi 15 oder méi Salariéen hunn, an deemno eng Delegatioun mussen hunn. Äntwerte kruten d'Fuerscher a bal der Hallschent vun de Fäll.

12 Prozent soten, si hätte keng Delegatioun. Dofir géifen et vill méiglech Erklärunge ginn, mee hei wier et un der Gewerbeinspektioun, d'Applikatioun vum Gesetz ze iwwerpréiwen, seet d'Carole Blond-Hanten. Wat d'ITM an dëse Fäll gemaach huet, wier an der LISER-Etüd awer net ënnersicht ginn.

Eng méi breet ugeluechten Etüd

De LISER plangt, fir seng Etüd iwwer de Sozialdialog an de Betriber bei der nächster Erhiewung méi breet unzeleeën. Virbild ass déi sougenannt "Enquête-Réponse" ("Relations professionnelles et négociations d'entreprise"), déi zanter den 90er all sechs Joer am Optrag vum franséischen Aarbechtsministère realiséiert gëtt:

"A Frankräich maache si dat ganz komplett. Si froen d'Salariéen an da kréien d'Direktiounen oder d'Direktioune vun de Ressources humaines ee Questionnaire 'en face-à-face' an och d'Personaldelegatiounen 'en face-à-face'. Do huet een am Fong déi dräi Facettë vun den dräi Haaptacteuren an den Entreprisen."

Ouni esou Enquêten, betount d'Fuerscherin, wéisst een eigentlech net richteg, ob a wéi de Sozialdialog an de Betriber generell funktionéiert.

An der Mediathéik:

Aktuelles / / radio 100,7
Lauschteren

Méi zum Thema

Claude Strasser a Gilbert Goergen
Sozialwahlen 2019

Déi wichtegst Revendicatioun vum Postsyndikat fir de Kollektivvertrag wier et, d'Paien op een Niveau ze bréngen, datt d'Leit de Betrib net no dräi bis véier Méint verloossen, seet de Gilbert Goergen.

Nicolas Buck
Sozialwahlen

D'Patronat wëllt an den nächste Jore keng nei Initiativ fir d'Aféiere vun engem Auslännerwahlrecht ze lancéieren, seet den Nicolas Buck. Den Nach-President vun der FEDIL gëtt a knapp engem Mount den neien UEL-President.

De Jean-Claude Poos vun der NGL-SNEP
Sozialwahlen 2019

D'NGL-SNEP kandidéiert bei de Sozialwahlen net méi fir d'Salariatskammer. Fir kleng Gewerkschafte wier dat ze opwändeg. Wéi eng Bedeitung hunn d'Sozialwahle fir eng kleng Gewerkschaft wéi d'NGL-SNEP?

Eng Versammlung
Sozialwahlen 2019

An enger S.A., bei där de Staat iwwer 25 Prozent vun de Parten huet, muss d'Personal am Verwaltungsrot vertruede sinn. Dat gëtt net ëmmer agehalen, well keen d'Applikatioun vum Gesetz afuerdert.

Programm

  • Virum Dag

  • On air

    Moies-Magazin

  • Iwwer Mëtteg

  • Resonanzen

  • Spektrum

Dossieren

  • Lëtzebuerg entdecken

    De Summer ass normalerweis déi Zäit, an där de Lëtzebuerger an d'Vakanz fiert. Mee net nëmmen am Ausland gëtt et vill ze entdecken, och hei am Land ginn et vill schéin Ausfluchsziler.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Communiquéen

  • Un nouveau directeur pour la radio 100,7

    Lors de sa réunion du mardi 26 mars 2019, le Conseil d'administration de l'Établissement de Radiodiffusion Socioculturelle a nommé Marc Gerges comme nouveau directeur de la radio 100,7.

  • radio 100,7 revue par ses pairs

    A la demande de la radio 100,7, l'Union Européenne de Radio-Télévision a procédé à une "revue par les pairs" des opérations de la radio 100,7.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen