Landwirtschaft D'Dréchent mécht de Mëllechbaueren ze schafen
De feelende Reen mécht de Mëllechbaueren ze schafen. Elo scho misst hie sengen Déiere Fudder ginn, well d'Gras op de Wisen net duergeet, sou de Charel Wildgen, deen zu Fenneng 80 Mëllechkéi huet. Ënner normale Bedingunge géif ee réischt Enn August mat gelagertem Hee a gehäckseltem Mais nofidderen. Net all Betrib wier d'selwecht vun der Dréchent betraff, esou de Charel Wildgen. Dat géif zum Deel vun der Lag vun de Wisen a Felder ofhänken.
Um sech Auer moies kréien d'Kéi am Charel Wildgen sengem Stall hiert Fudder. Dono gi se gestrach an d'Aarbechten un de Felder a Wise gemaach, owes gëtt et dann nach eng Kéier Fudder am Stall. Aussergewéinlech ass dëse Programm fir ee Summer, beim Charel Wildgen. Normalerweis geet d'Gras op de Wisen duer, seet de Bauer. Dat wier elo awer net méi de Fall. Fir dëst Joer wäerte seng Fudderreserven nach duergoen. Wann et déi nächst Joren awer weider zu sou aussergewéinlech laangen Drécheperiode kënnt, kéint och dat net méi garantéiert ginn. Fréier hätt een och mol Fudder verkaaft, dat een ze vill hat. Dat wier am Moment awer net méiglech an dofir géife Suen an der Keess feelen, seet de Charel Wildgen.
Eng Kou brauch ronn 40 Kilo Fudder den Dag. Tëscht 2.300 an 2.500 Euro kascht dat zousätzlech Fudder de Bauer pro Mount. 14 Hektar Mais huet hien ugebaut. Wéinst der Dréchent ginn d'Planzen awer ze fréi dier, esou de Charel Wildgen. Wann et déi nächst zwou Wochen net reent, da wier eng Planz mat enger gewësser Héicht do, mee se hätt nach kee richtege Kär gebilt a misst dann an de Silo agelagert ginn.
"Well wa se méi dréche gëtt wéi 35 Prozent Trockensubstanz, da siléiert se sech net méi gutt. Dat heescht, da muss ee se iergendwann huelen, och wann d'Qualitéit nach net déi ass, déi se sollt sinn."
De Süde vum Land ass traditionell ee Gréngland-Standuert. Do missten d'Wisen eigentlech duer goen, fir datt d'Kéi genuch ze friesse kréien. Wann et an Zukunft weider méi dréche géif ginn, da misst ee sech Gedanke maachen, wéi een an Zukunft kéint domat ëmgoen, wat de Präis vu senge Produite géif an d'Luucht dreiwen, sou de Mëllechbauer Charel Wildgen.
Méi zum Thema
Net genuch Reen: Landwirtschaftlech Kulturen hu gelidden
D'Fréijoer war ze dréchen, esou de Bilan vum meteorologesche Service vum Landwirtschaftsministère. Vu Mäerz bis Mee huet et net genuch gereent, vill landwirtschaftlech Kulture konnte sech net optimal entwéckelen.
Dréchent an héich Düngerpräisser bereeden de Bauere Suergen
Déi éischt Méint vum Joer waren ze dréchen, et huet bis zu 50 Prozent manner gereent. An der Landwirtschaft géif een dës Dréchent spieren, stellt de President vun der Landwirtschaftskummer Guy Feyder fest.
