Aviatioun Corona: "Gewalteg finanziell Perte" fir d'Luxair

Luxair-Tours mécht muer Samschdeg hir lescht regulär Flich. De leschte reguläre Ligne-Vol ass e Sonndeg den Owend, esou de Luxair-Generaldirekter Adrien Ney de Mëtteg am 100,7-Interview. Regulär Luxair-Flich wäerten et awer no dësem Weekend fir op d'mannst e puer Woche keng méi ginn.

Serge Kesseler / cz

Adrien Ney

De Bäitrag vum Serge Kesseler lauschteren


Den aktuelle Pläng no wäert Luxair-Tours den 20. Abrëll erëm fléien an d'Airline den 1. Mee. Dat wieren awer "theoretesch Datumer", sou de Generaldirekter Adrien Ney. Et wéisst een net, wéini d'Corona-Kris am Grëff wier.

"Menger perséinlecher Meenung no wäerte mer eréischt am Juni erëm ufänke mat fléien."

Fir d'nächst Woch sinn nach eege Luxair-Rappatriements-Flich aus Portugal geplangt. Wann eng Ufro vun der Regierung kéim, wier d'Luxair och fir Spezialflich bereet, fir Leit zeréck an d'Land ze bréngen.

Beim Cargo-Handling vun der Luxair géif et eng positiv Entwécklung ginn, esou den Adrien Ney zu den Aktivitéiten am Cargo-Zenter um Findel. Et hätt sech alles op de Cargo-Beräich konzentréiert "an do leie mer tëschent fënnef an aacht Prozent iwwer dem Joer vu virdrun. Dat ass déi eenzeg gutt Noriicht", sou den Adrien Ney.

Den Adrien Ney schléisst net aus, datt Luxair staatlech Hëllef muss ufroen

Generell géif d'Corona-Kris "gewalteg finanziell Pertë" fir de Grupp bedeiten, mee d'Luxair hätt Reserve fir d'Corona-Kris duerchzestoen. De Moment géif et bei der Luxair kee Besoin fir eng Staatshëllef ginn. Jee no Entwécklung vun der Kris schléisst de Generaldirekter dat awer fir d'Zukunft net aus.

"Wann déi Kris natierlech elo e Joer dauert, da géif ech eng Demande net ausschléissen. Mee ech menge mir ginn all dovun aus - och wa mir vläicht e wéineg méi pessimistesch sinn - dass déi Krise an zwee-dräi Méint misst eriwwer sinn."

D'Luxair huet fir de Mäerz an Abrëll Kuerzaarbecht fir Deeler vum Personal ugefrot, esou den Adrien Ney.


Den Adrien Ney iwwer d'Kuerzaarbecht


De François Bausch hat de Moien am 100,7-Interview Bereetschaft signaliséiert, datt de Staat der nationaler Airline Luxair géif hëllefe, fir datt se bestoe bleift. Wann néideg géif de Staat seng Responsabilitéit iwwerhuelen, esou de Minister.

Net verpassen

  • 17.10. De Gudden Toun

    De Gudden Toun.jpg

    Wann d'Deeg méi kal, gro a kuerz ginn, stécht deen een oder anere vläicht de Kapp nees méi an déi sozial Medien. An der Oktober Editioun schwätzen de Roland Meyer, Ian De Toffoli, Raoul Biltgen, Jeff Schinker an d'Anne Klein.

Programm

Dossieren

  • Bundestagswal 2021

    Däitschland wielt de Samschdeg, 26. September en neie Bundestag. Wat sinn d'Enjeuen, wie gëtt Kanzler oder Kanzlerin, wéi verleeft d'Wahlkampagne. An eisem Dossier zum Theema Bundestagswal gidd Dir alles gewuer.

  • Olympesch Spiller 2021

    D'Olympesch Spiller fannen, mat engem Joer Verspéidung, tëscht dem 23. Juni bis den 8. August zu Tokyo statt. Fir eis op der Plaz ass eise Korrespondent Philip Crowther.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen