Bundestagswahlen "D'AfD muss eescht geholl ginn"
De Succès vun der AfD an Däitschland ass den Ausdrock vun engem grondleeënde politesche Konflikt. Der Meenung ass de Prof. Dr. Edgar Grande. Dem Politikwëssenschaftler vun der Ludwig-Maximilians-Universität München no wäert déi rietsradikal Partei sech laangfristeg am Bundestag etabléieren. Déi aner Parteie missten d'AfD elo eescht huelen.
Mam Succès vun der rietsradikaler AfD hätt Däitschland d'Entwécklung, déi et an anere westleche Länner scho gëtt, nogeholl. D'Resultat wier net onerwaart. Et wier den Ausdrock vun engem grondleeënde Changement vu politesche Konflikter, déi duerch verschidden nei Theme gepräägt sinn. Dorënner Europa, d'Awanderung an d'Flüchtlingspolitik. Datt dës wichteg Sujete beim Wahlkampf net thematiséiert goufen, wier e Feeler gewiescht, esou de Prof. Dr. Edgar Grande.
"Dat war eng strategesch Decisioun vun de grousse Parteien. Mä et ass bewisen, datt den Opstig vun esou Parteien wéi der AfD net verhënnert ka ginn andeems ee wichteg Sujeten evitéiert". D'Wieler hätten en Usproch op esou wichteg Themen. "Dat mussen déi grouss Parteien elo souwisou maachen, well d'AfD jo am Bundestag ass".
SPD beweist, datt si schwaach ass
Datt d'Sozialdemokraten no de Wahlen direkt decidéiert hätten an d'Oppositioun ze goen, wier net clever gewiescht, mengt de Politikwëssenschaftler op der Münchener Ludwig-Maximilians-Universität. Deemno géif d'SPD beweisen, datt si eng schwaach Partei wier, well de Martin Schultz sech net sécher konnt sinn, op d'Membere vun der Partei nach eng kéier eng grouss Koalitioun hätte wëlle matdroen. Elo géif et "ëm déi grondsätzlech Ausriichtung vun der Partei" goen.
An der Mediathéik:
LauschterenMéi zum Thema
"Nees Nazien am Reichstag"
70 Joer nom Enn vum Krich géifen nees rietsextrem Gedanken an Däitschland propagéiert ginn, seet de Jean Asselborn. All déi demokratesch Parteie misste sech elo géint d'AfD wieren.
"Ganz Berlin hasst die AfD!"
D'Bundestagswahl huet mat der AfD ee grousse Gewënner. Zu Berlin sinn awer honnerte Leit géint déi rietsextrem Partei op d'Strooss gaangen. D'SPD frënnt sech iwwerdeems mat der Oppositiounsroll un.
Merkel an CDU/CSU stäerkste Kraaft an Däitschland
CDU an CSU kommen éischten Héichrechnungen no op 32,5 Prozent. Mat 13,5 Prozent zitt d'AfD an d'Parlament an a gëtt drëttstäerkste Kraaft hannert der SPD, déi op 20 Prozent kënnt.
Mat groussen Ambitioune Richtung Bundeskanzler
Den éisträicheschen Ausseminister wëll d'Mëttelmierroute fir Flüchtlingen zoumaachen. Mat senger Fuerderung weist de Sebastian Kurz, datt hie grouss Ambitioune fir d'Wahlen am Oktober an Éisträich huet.
