Bundestagswahl 2017 D'AfD däerf net ausgeschloss ginn
Vun en Dënschdeg un ass déi rietsnational Alternative für Deutschland (AfD) mat 92 Deputéierten am däitsche Bundestag vertrueden. Déi aner Parteie mussen elo den Debat mat de Rietsnationale sichen, amplaz si auszeschléissen.
Eppes iwwer zéng Dausend Leit si leschte Sonndeg zu Berlin ëm d'Reichtagsgebai gezunn. Si wollten en Zeeche setze géint "Haass a Rassismus", ier déi 92 neigewielten Deputéiert vun der Alternative für Deutschland (AfD) hir Plaz am Bundestag anhuelen. Dëse Geste war ouni Zweiwel e gutt Zeeche fir déi däitsch Demokratie: Déi friddlech Demo huet gewisen, datt vill Däitscher sech Suerge maachen, well elo eng Partei an d'Parlament kënnt, déi am Wahlkampf ëmmer nees friemefeindlech Aussoe gemaach huet.
Besser Argumenter an Inhalter bréngen
Mä gutt gemengte Protest eleng geet net duer, wann een der AfD de Wand wëllt aus de Segelen huelen - dat gëllt virun allem fir d'Deputéiert vun anere Parteien, déi der AfD am Parlament géigeniwwer setzen. Si musse vun en Dënschdeg u weisen, datt si déi besser Argumenter hunn, wéi hir rietsnational Konkurrenz.
Dobäi geet et net duer, ëmmer erëm drop hinzeweisen, d'AfD wier rietsextrem a rassistesch. Politiker, déi d'AfD wëlle stoppen, mussen inhaltlech argumentéieren an de Wieler erklären, firwat der AfD hir provokativ Parolë keng politesch Léisunge sinn. Wien dogéint probéiert, seng politesch Géigespiller vu vir eran aus moralesche Grënn vum demokrateschen Debat auszeschléissen, riskéiert e Selbstgol ze schéissen.
Ausernanersetzung ass virprogramméiert
Datt déi Gefor besteet, weist eng rezent Personaldiskussioun: Normalerweis kann all Fraktioun am Bundestag e Vizepresident stellen, deen d'Parlament ka representéieren a leeden, wann de President selwer net disponibel ass. D'AfD huet hiren Deputéierten Albrecht Glaser fir dëse Poste proposéiert. E Mann, deen an der Kritik steet, well hien dem Islam déi gesetzlech verankert Reliounsfräiheet wëllt oferkennen. D'SPD, d'FDP, déi Gréng an déi Lénk hunn dofir ugekënnegt, datt si de Kandidat wëlle blockéieren.
Eng Kontrovers fir déi éischt Bundestagssëtzung ass domat virprogramméiert: Si erlaabt der AfD, sech als Affer duerzestellen, ier iergend e politeschen Inhalt am neie Bundestag konnt ugeschwat ginn.
An der Mediathéik:
LauschterenMéi zum Thema
Meenung
D'Afd - eng Alternativ géint Däitschland
No de Bundestagswahlen schéngt Däitschland op dësem "Tag der Deutschen Einheit" méi gespléckt wéi jee. Eng rassistesch Partei ass drëtt Kraaft am Bundestag a schiert Angscht virum Islam.
Meenung
D'AfD an d'Metamorphos vun der Welt
Et ass wichteg op nationalem mä och op internationalem Plang géint Parteie wéi d'AfD ze kämpfen. Well déi, déi vun dësen ideologesche Beweegunge profitéieren, weltwäit agéieren, mengt den Denis Scuto.
"D'AfD muss eescht geholl ginn"
De Succès vun der AfD ass den Ausdrock vun engem grondleeënde politesche Konflikt. Där Meenung ass de Prof. Dr. Edgar Grande, Politikwëssenschaftler op der Ludwig-Maximilians-Universität München.
"Nees Nazien am Reichstag"
70 Joer nom Enn vum Krich géifen nees rietsextrem Gedanken an Däitschland propagéiert ginn, seet de Jean Asselborn. All déi demokratesch Parteie misste sech elo géint d'AfD wieren.
