No Avis vu Chamberverwaltung CSV: Situatioun vun der Superdreckskëscht muss regulariséiert ginn
Am Dossier Superdreckskëscht besteet d'CSV drop, datt d'Situatioun regulariséiert gëtt. Fir si steet ausser Fro, datt d'Chamberverwaltung mat engem rezenten Avis richteg läit. Deemno hätt de Kontrakt vun 2018 tëscht dem Staat an der Firma Oeko Services Lëtzebuerg, déi d'Superdreckskëscht bedreift, misse mat engem Spezialgesetz vun der Chamber ofgeseent ginn. Dat misst elo nogeholl ginn, sou de Fraktiouns-Co-President Gilles Roth den Donneschdeg virun der Press.
D'Fro déi sech géif stellen ass, ob een d'Situatioun esou iwwerhaapt kéint regulariséieren oder ob een net "vun null" misst ufänken, sou de Gilles Roth. Déi Fro misst nieft der Chamber och de Conseil d'Etat tranchéeren. Et wier deemno um Staatsrot ze klären, ob et iwwerhaapt méiglech ass, d'Situatioun nodréiglech an d'Rei ze bréngen, oder ob déi ganz Prozedur - vun der Ausschreiwung bis bei d'Attributioun vum Kontrakt - nach eemol komplett nei opgerullt muss ginn.
Onofhängeg dovun, erwaart d'CSV Äntwerten op eng ganz Partie oppe Froen an deem Dossier. Froen, déi zum Deel duerch deen onkompletten Audit opgeworf gi wieren, deen d'Ëmweltministesch viru véier Méint virgestallt hat. D'Carole Dieschbourg wier der Chamber Rechenschaft schëlleg, sou de Gilles Roth.
"Mir hätte gär, dass dat a voller Transparenz geschitt. Geschitt dat net an der zoustänneger Ëmweltkommissioun oder mat der Budget-Kontrollkommissioun zesummen, da wäerte mir deen Debat am Plenum féieren. A mir wäerte gegebenenfalls - wann dann nach gemauert gëtt - eng Enquête-Kommissioun froen."
Dee Moment wier et dann un der Koalitioun ze decidéieren ob se "31-29 un der Koalitions-Raison" festhält, oder ob se fir Transparenz wéilt stoen, sou de Gilles Roth. Da wier et och intressant ze gesinn, ob déi gréng och bei sech selwer héich Transparenz-Moosstief usetzt, oder net, sou nach den CSV-Co-Fraktiounspresident.
Méi zum Thema
Finanzement vu Superdreckskëscht wërft Froen op
De Finanzement vun der Superdreckskëscht ass net esou gereegelt, wéi et d'Verfassung virgesäit, esou déi wëssenschaftlech Cellule vun der Chamber. Eng iwwerraschend Feststellung mat Konsequenzen, déi wäit ginn.
CSV: Audit iwwer d'Superdreckskëscht geet net wäit genuch
Den Audit iwwer d'Superdreckskëscht geet der CSV net wäit genuch. Et missten an engem zweete Schrëtt och Aspekter wéi eventuell Interessekonflikter analyséiert ginn, esou den CSV-Deputéierte Paul Galles.
Audit proposéiert Adaptatiounen
Et kéint ee punktuell Adaptatioune maachen, mee u sech wier alles an der Rei, dat ass kuerz resuméiert d'Conclusioun vum Audit iwwer d'Superdreckskëscht. Et hätt ee keng Irregularitéite kënne feststellen.
CSV: Superdreckskëscht soll net méi privat gefouert ginn
D'CSV plädéiert dofir, d'Aktioun Superdreckskëscht vun engem Etablissement public iwwerhuelen ze loossen, seet de Paul Galles. Dëst nodeems een Artikel vu reporter.lu eng Rei Froe ronderëm d'Firmekonstrukt opgeworf hat.
