Petitioun 2007 CSV wäert Prozedur fir Referendum net declenchéieren
D'Petitioun 2007 ass zënter Mëtternuecht zou: de Compteur ass um Enn bei 18.579 elektroneschen Ënnerschrëfte stoe bliwwen. Also wäit ënner de 25.000 Signaturen, déi d'CSV-Deputéiert dozou bruecht hätten, e Referendum iwwer d'Verfassung ze froen.
De Käerjenger Député-maire Michel Wolter geet dovun aus, datt déi Pist fir zu enger Volleksofstëmmung ze komme sech domat zerschloen huet. Hie géif eng deementspriechend Decisioun vu senger Fraktioun och respektéieren, souguer wann hie perséinlech der Meenung ass, datt een d'Leit iwwer den Text ofstëmme loosse sollt.
Hie géif do de Kompromëss verdeedegen, deen een an der Fraktioun virun 3 Wochen ënner kontroversen Diskussioune geholl hat.
Domat wäert d'CSV kee Referendum iwwer d'Verfassungsreform declenchéieren, esou de Michel Wolter:
"Wann dat Resultat esou ass, da ginn ech emol dervun aus, datt déi Propositioun, déi mir gemaach hunn, datt déi hire Wee net fonnt huet an déi dote Piste wäert dann och net goen."
De Michel Wolter huet awer och ënnerstrach, datt d'CSV déi proposéiert Ännerunge vun der Constitutioun am Géigesaz zu der ADR ënnerstëtzt.
Vum 19. November u kann all ageschriwwene Wieler op senger Gemeng eng Lëscht ënnerschreiwen, a sech op déi Manéier fir e Referendum iwwer den éischten Deel vun der Verfassung - d'Justiz-Kapitel - ausschwätzen. Wann am Ganze 25.000 Wielerinnen a Wieler dat maachen, gëtt den zweete Vott an der Chamber duerch esou eng Volleksofstëmmung ersat. Wann déi néideg Ënnerschrëften net zesumme kommen, wäert den Text um parlamentaresche Wee gutt geheescht ginn.
An der Mediathéik:
LauschterenMéi zum Thema
Demande fir Referendum ass beim Staatsministère ukomm
Et ass eng offiziell Demande fir eng Referendums-Prozedur vun engem Comité d'initiative beim Premier Xavier Bettel gemaach ginn. Dat deelt de Staatsministère an engem Communiqué mat.
Referendum: Wéi zwee CSV-Deputéiert neie Revirement provozéiert hunn
D'CSV huet hir Positioun zum Referendum iwwer d'Verfassungsreform wéinst internen Divergenze erëm revidéiert. Ausléiser dës Kéier waren 100,7-Informatiounen no d'Deputéiert Marc Spautz a Michel Wolter.
Méigleche Referendum bei Verfassungsreform: "Dat Normaalst vun der Welt"
De Mars Di Bartolomeo betount, datt ee Referendum iwwer d'Verfassungsreform respektéiert géif ginn, wa 25.000 ageschriwwe Wieler dat fuerderen. Dat géif den zweete Vott an der Chamber ersetzen.
Verfassungsännerungen: Wéi kann et zu engem Referendum kommen?
Eng ëffentlech Petitioun fir e Verfassungsreferendum wäert an der Chamber debattéiert ginn, d'Parteie wäerte sech nach eemol zur Fro musse positionéieren. Ee Referendum kéint vum Parlament a vu Bierger declenchéiert ginn.
