Pandemie Coronavirus: Wéi verleeft d'Krankheet?

Flatten the curve - d'Kurb vun den Ustiechunge mam neie Coronavirus flaach halen - dat ass den Objektiv vun den ënnerschiddlech Mesuren, déi uechter d'Welt en Place gesat ginn. Dat ass wichteg fir de Gesondheetssystem net ze iwwerlaaschten, betount d'Gesondheetsministerin Paulette Lenert. Wéi verleeft d'Krankheet Covid-19, déi de Virus ausléist? Wéi ginn d'Patiente behandelt a firwat ass dat esou eng Belaaschtung fir de Gesondheetssystem?

Michèle Sinner / cbi

COVID-19
Foto: Bigstock / diy13

Covid-19 ass eng viral Infektioun, ausgeléist duerch den neie Coronavirus, seet de Romain Nati, Direkter vum CHL, dee selwer Longendokter ass. Bei verschidde Leit kéint dat zu enger Longenentzündung feieren. Dës Longenentzündung kéint eng méi liicht Form unhuelen, se kéint awer schlëmmste Fall déi zwee Longeflilleke komplett befalen.

Et gi keng Medikamenter

Normalerweis géif ee probéieren, déi Infektioun antiviral ze behandelen, seet de Romain Nati. Dat wier de Moment awer nach net méiglech, well et keng Medikamenter géif ginn.

De CHL hëlt un enger internationaler Studie deel fir e Medikament ze testen, dat nach net um Marché zougelooss ass, a China awer villverspriechend Resultater gewisen huet. CHL-Patienten, déi d'Krittäre vun der Studien erfëllen, kéinten dat Medikament kréien, esou de Romain Nati.

Soss hätt een awer keng Medikamenter, seet de Romain Nati. Dofir misst een elo d'Zäit iwwerbrécken a waarden, "datt déi natierlech Heelungskräften Iwwerhand huele géint déi Infektioun."

Patiente mussen zum Deel mechanesch beotemt ginn

Wann d'Kapazitéit vun de Longen duerch d'Longenentzündung erofgeet, mussen d'Patiente Sauerstoff kréien, esou den Direkter vum CHL. Verschidde Fäll wieren esou schlëmm, datt et net géif duergoe Sauerstoff zouzeféieren, sou datt de Patient misst ënner eng mechanesch Ventilatioun gestallt ginn, wou dann eng Maschinn d'Ootmung géif iwwerhuelen, preziséiert de Romain Nati.

Dofir stellt sech d'Fro, wéi vill Plazen a Better et ginn, déi mat esou Beootmungsmaschinnen ekipéiert sinn. Déi sinn an de Reanimatiounsdepartementer vun de Spideeler, wou d'Soins intensifs administréiert ginn. Der Carte sanitaire no géifen et 196 Intensivbetter ginn, seet d'Françoise Berthet, Sousdirectrice an der Santé.

Better an de Spideeler

"Middle-care"-Better kéinten och séier an "intensive-care"-Better ëmgewandelt ginn. D'Spideeler kennen awer och aner Plaze liberéieren. Beispillsweis an den OP-Säll, dofir seet de Romain Nati, am CHL kéint ee kuerzfristeg vu 24 op 50 Intensivbetter eropgoen, fir Covid-19-Patienten ze beootmen.

D'Regierung bestellt zousätzlech 30 Beootmungsmaschinnen, si wieren disponibel, dat wier kee Problem, seet d'Françoise Barthet. Fir déi Leit, déi eng maschinell Beootmung kréien, ze behandelen, misst d'Fleegepersonal eng Formatioun an en Training hunn. Hei géif ee riskéieren un de Maximum vun de Kapazitéiten ze kommen, mengt d'Sousdirectrice vun der Santé.

Lëtzebuerg hänkt vu Frontalieren of

Lëtzebuerg ass ëmsou méi vulnerabel, well 70 Prozent vum Personal am Gesondheets- a Fleegesecteur Frontaliere sinn, wéi de Xavier Bettel d'lescht Woch erkläert huet. Fir datt si weider kënne schaffen, wann d'Nopeschlänner d'Grenzen zoumaachen, offréiert d'Regierung elo, fir si mat hire Famillen an den Hotellen ënnerzebréngen, déi wéinst de Reesaschränkungen eidel sinn.

Well de kruziale Punkt d'Personal ass, kuckt de Gesondheetsministère och, fir Lëtzebuerger mat medezinescher Ausbildung an de Verwaltungen ze mobiliséieren. D'Medezinsstudenten hunn hir Hëllef ugebueden. Fir aner Leit mat der néideger Ausbildung, déi de Moment net schaffen a wëllen asprangen, sollen an e puer Deeg Kontaktdonnéeë kommunikéiert ginn, wou si sech kënne mellen.

An der Mediathéik:

Aktuelles / / Michèle Sinner
Lauschteren

Méi zum Thema

Ursula von der Leyen
Coronavirus

D'Europäesch Kommissioun proposéiert, fir d'EU-Baussegrenzen fir 30 Deeg zouzemaachen. Et wéilt een ausserdeem "green lanes" installéieren, fir datt den Transport vu Gidder assuréiert ka bleiwen.

Paul Junck
Coronavirus

Eng Course "contre la montre". Sou beschreift de President vun der Spidolsfederatioun d'Coronapandemie. Fir datt de Gesondheetssystem net iwwerlaascht gëtt, wier et wichteg Zäit ze gewannen, seet de Paul Junck.

Claude Meisch
Invité vum Dag

D'Regierung hätt den Appell vun Experten héieren. Esou dem Claude Meisch seng Äntwert op eng Ausso vum Generaldirekter vun den Hôpitaux Robert Schuman. Dësen hat gëschter drop higewisen, datt et kéint enk ginn, wa vill vu senge Mataarbechter Congé pour raisons familiales huelen.

 

Net verpassen

Programm

  • Notturno

  • On air

    Virum Dag vu 6 bis 10

  • Panorama

  • Virum Dag vu 6 bis 10

  • Noriichten

Dossieren

  • Klimakonferenz zu Glasgow

    Déi gréissten Weltklimakonferenz zanter Paräis fënnt tëscht dem 31. Oktober an 12. November zu Glasgow statt. Fir eis op der Plaz ass eise Korrespondent Philip Crowther.

  • Verfassungsreform

    D'Verfassung vun 1868 soll duerch eng nei Verfassung ersat ginn. 2009 gouf dëse Reformprozess formell lancéiert an nach ass d'Aarbecht net ofgeschloss. Et ass nach e Referendum iwwer den neien Text geplangt.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen