Corona-Mesuren CLC: Fermeture trëfft besonnesch déi kleng Geschäfter

De Bäitrag lauschteren

An de Medien hätt et vläicht esou ausgesinn, wéi wann et an de Butteker déi lescht Woche schwaarz vu Leit gewiescht wier, an der Realitéit hätt dat awer anescht ausgesinn.

Um Weekend wier zwar méi lass gewiescht, de Rescht vun der Woch wier dat awer net de Fall gewiescht, betount den Direkter vun der Handelsconfederatioun Nicolas Henckes. D'Chiffres d'affaires wier nach ëmmer "bei Wäitem" ënner dem Niveau vum leschte Joer.

Den Dezember wier zwar ee vun de bessere Méint fir de Commcerce, mee en hätt d'Betriber awer net ëmmer rette kënnen, mee se "bëssen iwwer Waasser gehalen". D'Fermeture géif sech "ganz schlëmm" op d'Tresorerie an d'Resultater auswierken, besonnesch vun deene klenge Geschäfter.

Propose vun der CLC goufen net zeréckgehalen

Et hätt ee probéiert eng komplett Fermeture vum net-essentielle Commerce ze verhënneren, mee d'Regierung wier op d'Propose vun der Handelsconfederatioun net agaangen, bedauert den Nicolas Henckes.

Ënner anerem hätt ee kënnen duerchsetzen, datt nëmmen nach eng Persoun eleng hätt dierfen akafe goen, esou wéi et an der Belsch de Fall ass. Doduerch hätt ee kéinten d'Densitéit an de Geschäfter erofsetzen, esou den Direkter vun der Handelsconfederatioun.

Verkaf vun net-essentielle Produiten

Fir méi Gerechtegkeet ze schafen, soll dës Kéier dat ganzt net-essentiellt Sortiment vun der Fermeture viséiert sinn, esou d'Annonce vum Premier Xavier Bettel. Dat heescht, datt een och net kann an enger grousser Surface eng Wäschmaschinn kafen, wärend den Elektrofachmaart seng Diere muss zouloossen. Fir den CLC-Direkter ass déi Annonce pure Marketing, d'Leit géifen esou Saachen am Ausland kafen.

Weider war et gëschter och d'Ukënnegung, datt d'Solde musse verréckelt ginn. D'Handelsconfederatioun wäert an den nächsten Deeg mam Secteur iwwer déi genee Modalitéiten dovunner diskutéieren, esou nach den Nicolas Henckes.