CO2-Steier Bréngt d'CO2-Steier eppes?

D'Regierung hat annoncéiert, datt 2021 eng CO2-Steier ageféiert gëtt, vun am Ufank 20 Euro pro Tonn CO2. De Raymond Aendekerk seet, dat wier "homeopathesch".

"Dat geet sécher net duer, fir elo iergendwéi en Effekt ze hunn, fir datt eppes passéiert. Ech kann dat net ausrechnen, mee ech mengen dat wäert an der nächster Zäit ausgerechent ginn. Vläicht gëtt et e Modell vum Staat, dee weist, wou da lo de Punkt wier, wou et en Effekt hätt - mee dee läit net bei 20 Euro."

De René Winkin gesäit dat anescht: Mat 20 Euro pro Tonn kéint een areechen, datt en Deel vum Spritverkaf sech an d'Ausland verlagert. Dat géif awer nëmme fonctionéieren, wann d'Accisen an eise Nopeschlänner um aktuellen Niveau bleiwen, esou de FEDIL-Direkter.

"Mir sinn haut den Zweetbëllegsten an eiser Géigend - d'Belsch ass bei de Camionneuren dat bëllegst Land an den Accisen. Wann déi elo géifen do bléiwen, wou se sinn a mir géifen fënnef oder nach méi Cent eropgoen, da géif ech scho mengen, datt Lëtzebuerg duerch Verlagerung de Gros vum Zil wäert areechen. Wann natierlech déi Länner ronderëm eis och eropginn, da gesäit dat Bild erëm anescht aus."

CO2-Emissiounen erofkréien

Den Direkter vun der Industriellefederatioun seet, fir d'Lëtzebuerger Industrie wier et schwéier hir CO2-Emissioun bis 2030 ëm 55 Prozent ze drécken. D'Industriebetriber zu Lëtzebuerg géifen nämlech gréisstendeels mat Stroum funktionéieren, a manner mat fossiller Energie, esou de René Winkin:

"Wa mer doheem an den Haiser sinn, an et seet een et wéilt ee méi effizient ginn, dann denkt all Mënsch u säin Haus, wat dat verbraucht. En denkt net u säi Staubsauger, u seng Tëlee. An an der Industrie ass et éischter ëmgedréit: Do wier de Staubsauger an d'Tëlee eigentlech dat, wat exposéiert ass, an herno d'Hëtze vun der Hal mat Gas, oder d'Virhëtze vun engem Produkt, dat ass dacks méi marginal."