Gläichberechtegung Bluttspenden: Aschränkunge fir homosexuell Männer solle falen
Och zu Lëtzebuerg sollen d'Aschränkunge fir homosexuell Männer beim Bluttspende geschwënn der Vergaangenheet ugehéieren, opmannst wann et der Gesondheetsministesch Paulette Lenert no géif goen. Den Ament kënnen homosexuell Männer kee Blutt spenden, mee just Plasma, an dat och nëmme wa se véier Méint virdru kee gläichgeschlechtleche Geschlechtsverkéier haten.
Bluttspenden onnéideg aschränken an Zäite wou dréngend Blutt géing gebraucht ginn, dat misst net sinn. Doriwwer eraus wier et eng Fro vu Gerechtegkeet an Diskriminatioun, esou d'Paulette Lenert haut Dënschdeg an enger Froestonn an der Chamber. D'Responsabilitéit léich bei der Croix Rouge, déi sech hei am Land géif ëm d'Bluttspende këmmeren. Dësen Donneschden wier eng Reunioun mat der Croix Rouge virgesinn.
Si wäert sech dee Moment dofir asetzen, datt d'Fro no der sexueller Orientéierung aus dem Questionnaire erausgeholl wäert ginn, fir datt Lëtzebuerg zu deene Länner kéint gehéieren "kënnen houfreg sinn datt mer keen Ënnerscheed méi maachen".
Méi zum Thema
Appell vum Roude Kräiz: "Gitt Blutt spenden"
D'Rout Kräiz lancéiert reegelméisseg Appelle fir Blutt ze spenden. Aktuell sinn d'Reserven aus verschiddenen Ursaachen e gutt Stéck erofgaangen. Deen Trend muss gestoppt ginn.
Croix Rouge a Caritas maachen Opruff fir Kleeder ze spenden
Dëst Joer sinn zu Lëtzebuerg nach méi Mënschen op Kleederspenden ugewise wéi gewinnt. D'Caritas a Croix Rouge hunn dofir zesummen en Opruff lancéiert. Mir beim Roude Kräiz nogefrot wat elo am dréngendste gebraucht gëtt.
