D'Europäesch Kommissioun huet proposéiert, den Datum vum Enn vum Verbrennungsmotor op 2035 ze fixéieren. Virun dräi Wochen hat sech d'Europaparlament deem Virschlag ugeschloss. Fir Lëtzebuerg wier et esouguer besser, wann deen Delai nach éischter wier, sot de Mëtteg d'Ëmweltministesch Joëlle Welfring.
Däitschland mat ënnerschiddleche Signaler
Virun allem Däitschland deet sech schwéier an där Fro. Déi däitsch Regierung schéckt ënnerschiddlech Signaler eraus. Zwar steet am Koalitiounsvertrag, datt een hannert der Propose vun der Kommissioun steet, de liberale Finanzminister Christian Lindner awer huet dat rezent a Fro gestallt. Villäicht och dowéinst ass de Moien déi däitsch Regierung direkt mat zwee Ministeren op der Reunioun um Kierchbierg ugetrueden.
Däitschland wëll elo een Zousaz an den Text erakréien, dee seet, datt d'Kommissioun soll iwwerpréiwen, wéi och Autoen, déi mat CO2 neutralem Sprit fueren, eventuell kéinten no 2035 nach zougelooss ginn.
Italie fir 2040, Lëtzebuerg dogéint
Italien hat sech fir een Enn vum Verbrenner eréischt am Joer 2040 agesat - dat wier fir Lëtzebuerg net akzeptabel, sou déi gréng Ministesch. Well ee groussen Deel vun den Emissiounen aus dem Stroosseverkéier kommen, misst esou séier wéi méiglech Schluss si mat Motoren, déi CO2 an d'Loft blosen.
Wourop genee ee sech um Enn eens gëtt, dass den Ament net ofzegesinn.
