Mäin Europa Arel-Lëtzebuerg / Lëtzebuerg-Arel

D'Charlotte verbréngt all Dag op d'mannst zwou Stonnen am Auto. Si schafft zu Lëtzebuerg a wunnt an der Belsch. An eisem Reportage suivéiert d'Maxi Pesch den Alldag vun enger belscher Grenzgänger-Famill.

Maxi Pesch / cbi

Mäin Europa
Vill Frontaliere stinn all Dag am Stau

Méindeg Moien, hallwer 8 zu Arel treffe mir d'Famill Albert an engem grousse Familljenhaus. D'Charlotte huet 23 Joer a schafft zanter e puer Méint an enger Firma um Findel. Op d'mannst zwou Stonne verbréngt déi 23 Joer jonk Fra all Dag am Auto. En Trajet, dee fir déi meescht Grenzgänger mat der Zäit zu enger Gewunnecht géif ginn.

Normalerweis fiert d'Charlotte zesumme mat zwee Kolleegen an engem Auto op Lëtzebuerg. Trotzdeem géifen déi dräi net vun der neier Spuer fir Covoiturage tëschent Arel a Sterpenech, déi zanter Mee op ass, profitéieren.

D'Charlotte am Auto

Niewent dem Bensin mécht d'Charlotte de gréissten Deel vun hiren Akeef am Grand Duché. Si géif sech och guer net wéi en Auslänner fillen an hätt zu Lëtzebuerg vill international Frënn fonnt. Mee d'Distanz géif et der jonker Fra net ëmmer einfach maachen. No ronn 40 Minutte fuere mir hanner Miersch op d'Autobunn.

Et ass ze deier zu Lëtzebuerg ze liewen

Op Lëtzebuerg wunne komme wier eng gutt Solutioun. Och wann der Charlotte no souguer vill Awunner géifen am Stau stoen. Déi héich Wunnengspräisser géifen et der jonker Fra an hirem Partner den Ament awer net erlaben am Grand-Duché ze liewen. No enger décker Stonn si mir um Findel ukomm.

Zäit fir den nächste Familljemember ze treffen. Virun der zentraler Gare waart dem Charlotte säi Papp, de Christophe mat dräi weideren Aarbechtskolleegen, déi net wäit ewech vun der Gare schaffen.

De Christophe, dem Charlotte säi Papp an d'Violaine, eng Frëndin.

D'Christine kënnt vun Thionville. Fir net mussen am Stau ze stoen hëlt si de Bus scho ganz fréi. Vu Mäerz nächst Joer u soll den ëffentlechen Transport gratis ginn. Eng Verbesserung fir d'Mobilitéit gesinn déi heite Grenzgänger skeptesch.

Télétravail als Léisung?

Eng Solutioun fir d'Mobilitéit ze verbessere kéint dem Christophe no den Ausbau vum Télétravail sinn.

Mam Télétravail hat de Jean Christophe scho Problemer. Zanter 20 Joer mécht hien all Dag méi wéi 200 Kilometer Aller-Retour fir op seng Aarbecht am Grand-Duché ze kommen.

Ee Grond, wisou d'Grenzgänger dësen Trajet op sech huelen, wier eegenen Aussoen no als éischt eemol eng méi grouss Offer um Aarbechtsmarché wéi an de Grenzregiounen. Mee och finanziell Avantagë géifen eng Roll spillen. Avantagen ënner deenen am Endeffekt déi eege Regioun géif leiden, erkläert de Christophe.

Den Zuch huet mol eng Kéier kee Retard, seet de Christophe

Um 17h20 treffe mir de Christophe am Zuch Richtung Arel. Haut, ouni Retard.

Géint 18:15 ass de Christophe nees doheem, d'Charlotte ass nach mam Auto ënnerwee. Haut ass et gutt gaangen. Mee fir muer ass e Streik bei der belscher Bunn annoncéiert. Wéi d'Famill Albert sech dann organiséiert, bleift ofzewaarden.


An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.

An der Mediathéik:

Mäin Europa / / Maxi Pesch
Lauschteren

Méi zum Thema

nutriscore
Mäin Europa

Den Nutri-Score soll de Konsumenten ee vereinfachten Accès zu den Nährwäerter vun engem verschaffte Produit ginn. D'Françoise Keller huet fir d'Serie "Mäin Europa" nogefrot, wat den Nutri-Score bréngt.

En Elektrobus
Mäin Europa

Wann et ëm Klimaschutz a Loftqualitéit geet, sollten ëffentlech Administratioune mam gudde Beispill virgoen. Dofir hätt d'EU gären, datt Bussen, déi am ëffentlechen Transport fueren, ëmmer méi propper ginn.

Praktesch Infoen

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen