Op dëser COP27 soll een Accord fonnt ginn, dee garantéiert, datt méi aarm Länner genuch Finanzéierung kréie fir sech dem Klimawandel unzepassen. Gläichzäiteg sollen och déi Länner, déi elo schonn ënner de Konsequenze leiden, kompenséiert ginn.
Den nächste Schrëtt hunn d'USA bis elo net gewollt. D'Hoffnung ass et, datt sech déi Positioun zu Scharm-El-Scheikh ännere kéint.
Warnunge vum UN-Generalsekretär
Den UNO-Generalsekretär António Guterres huet a senger Ried ënnerstrach, datt déi zwou gréissten Ekonomien op der Welt - nämlech China an d'USA - eng besonnesch Responsabilitéit hätte fir bei engem gemeinsame Pakt matzemaachen.
"Dat ass eis eenzeg Hoffnung, fir eis Klimaziler ze erreechen. D'Mënschheet huet e Choix: kooperéieren oder stierwen. Et gëtt entweder e Klimasolidaritéitspak, oder ee kollektive Selbstmordpakt."
Weider huet den António Guterres betount, datt d'Welt op der Autobunn a Richtung Klimakatastroph fiert an dobäi op de Gas dréckt.
Den Impakt vun der Äerderwiermung
D'Weltklimakonferenz an Afrika soll besonnesch op den Impakt vun der Äerderwiermung op dësem Kontinent opmierksam maachen. Den ägyptesche President Abdel Fattah El-Sisi schwätzt vun engem Planéit, deen zu enger Welt vum Leide ginn ass.
De fréieren amerikanesche Vizepresident Al Gore sot, et misst een elo tëschent Liewen an Doud wiele misst, andeems een ophält fossil Energie ze benotzen. Hie war ee vun den éischten, deen um internationalen Niveau Alarm geschloen huet.
D'UN-Klimakonferenz ass dëst Joer zu Sharm-El-Sheik an Ägypten, et si bal 200 Staats- a Regierungscheffe beieneen, dorënner de Lëtzebuerger Premier Xavier Bettel.
D'Konferenz soll alles an allem zwou Wochen daueren. An honnerte vun Negociatioune solle Accorde fonnt ginn, déi d'Äerderwiermung op 1,5 Grad Celsius limitéiere sollen. En Zil, dat de meeschten Experten no net méi ze erreechen ass.
