Récktrëtt Anne Brasseur zitt sech aus aktiver Politik zréck
D'DP-Deputéiert Anne Brasseur trëtt no 42 Joer an der Politik aus der Chamber zréck. Dat huet déi geléiert Psychologin a fréier Educatiounsministesch um Dënschdeg Mëtteg ugekënnegt. Si huet hiren Demissiounsbréif agereecht a wäert hiert Mandat op den 31. Januar opginn. D'DP-Politikerin huet sech vill fir d'parlamentaresch Assemblée vum Europarot engagéiert, dee si tëscht 2014 an 2016 presidéiert huet.
An hirer Ried huet d'Anne Brasseur ënnert anerem de Wieler, der Regierung, der liberaler Partei an hire Frënn Merci gesot. Si hätt an hirer politescher Carrière ëmmer den Intérêt général am A gehalen, an dat op lokalem, nationalem oder europäeschem Plang. Et wier net ëmmer einfach gewiescht, mä si wier 42 Joer laang mat Häerz a Séil politesch aktiv gewiescht.
Nofolger gëtt de Frank Colabianchi
Nofolger vun der Anne Brasseur wäert den Nächstgewielte vun der DP bei de leschte Chamberswahlen, de Frank Colabianchi, ginn. Hie géif säi Mandat dann och untrieden, sou den aktuelle Buergermeeschter vu Bartreng, an dat mat vill Freed an Houfert. D'Anne Brasseur wier eng ganz grouss Perséinlechkeet an der DP, a wa sou eng Persoun engem d'Vertraue géif schenken, wier et schwéier, fir "Neen" ze soen.
De Frank Colabianchi wéilt säi Mandat als Buergermeeschter vu Bartreng weiderféieren - hie géif awer déi nächst Chamberswahlen am Oktober ofwaarden, fir z'entscheeden, ob hien et méiglecherweis géif néierleeën oder net. Hie wäert viraussiichtlech an der éischter ëffentlecher Chambersëtzung am Februar vereedegt ginn.
Méi zum Thema
Europarot a Korruptionsskandal mat Aserbaidjan verwéckelt
Den Aserbaidjan huet Deputéiert aus dem Europarot bezuelt. Kritike wéinst Verstéiss géint d'Mënscherechter goufe sou kleng gehalen. "Elo wësse mir, datt Sue gefloss sinn", seet d'Anne Brasseur.
"Et geet net drëms, ob de Bettel de Premier ass oder net"
De Xavier Bettel seet, hie géif net drop bestoe Premier ze bleiwen, wann d'DP no de Wahlen op en neits an d'Regierung kënnt. Domat weist hie sech méi zeréckhalend, wéi säi Vize-Premier Etienne Schneider.
