21 Prozent vun der Lëtzebuerger Populatioun fëmmen. Well de Grand-Duché domat ënner der EU-Moyenne läit, geséich een net direkt een Impakt vum Zigarettepräis op d'Fëmmverhalen, esou d'Reaktioun vun der Ministerin Paulette Lenert.
Dowéinst géif hire Ministère éischter op Preventiounsmesurë setzen. Bei der Präisfro weist d'Gesondheetsministerin sech trotzdeem diskussiounsbereet.
"Wann ee mech kann iwwerzeegen, datt de Präis wierklech déi Schrauf, ass un déi ee muss dréie goen, loossen ech gäre mat mir schwätzen. Mee dat si Fakten, déi ech à ce stade esou nach net virleien hunn."
Si wéilt fir de Moment éischter un de Verstand appelléieren, fir jonk Leit fréi op d'Konsequenze fir d'Gesondheet opmierksam ze maachen. Doru géif si "à priori" méi gleewen, wéi un eng reng Präispolitik, esou d'Paulette Lenert. Si géif sech awer fir all Diskussiounen an deem Beräich oppe weisen.
Keng Fro vun der Moralitéit
De Professer Bertrand Dautzenberg geheit Lëtzebuerg Steierdumping bei den Zigarette vir: doduerch géif d'Gesondheetssituatioun vun de Fransousen am Grenzgebitt mat Lëtzebuerg verschlëmmert ginn. De franséischen Dokter huet vun enger "moralescher Fro" geschwat.
D'Paulette Lenert gëtt deem net Recht: et hätt een e fräie Maart an eng ënnerschiddlech Präispolitik. "Ech denken net, datt dat eng Saach vu Moralitéit ass." D'Gesondheetsministerin verweist op eng "relativ konsequent Politik" fir Preventioun ze maachen.
Kompetenz läit beim Finanzministère
A Frankräich wäert de Pak Zigaretten den 1. Mäerz jee no Mark op zéng Euro oder méi klammen: d'Regierung zu Paräis wëllt domat eppes géint d'Fëmmen ënnerhuelen. Wier e Präis vun zéng Euro och hei am Land kuerz- oder mëttelfristeg denkbar? Dozou seet déi nei Gesondheetsministerin, datt alles denkbar wier.
De Präis vun den Zigarette wier awer net hire Ressort, dat géif de Finanzminister betreffen. Si kéint dofir och näischt an de Raum stellen, ob sech do eppes an noer Zukunft géif änneren. Gespréicher mam Finanzministère am Hibléck op eng nei Preventiounspolitik schléisst d'Paulette Lenert net aus.
