Police Judiciaire Aktiv Kannerpornographie bekämpfen

Dës Fäll, an deene Kanner fir pornographesch Zwecker mëssbraucht goufen, wieren och bei der BEE SECURE Stopline gemellt ginn. Dës hätt d'lescht Joer vun iwwer 700 gemellte Linke mat Kannerpornographie ongeféier 600 als méiglecherweis illegal agestuuft. Dat sot d'Responsabel vun der Stopline rezent am 100,7-Interview. D'Police Judiciaire hätt déi Informatiounen un d'Ausland weiderginn, esou de Claude Weis, Commissaire en Chef an der Jugendschutz-Sektioun bei der PJ.

Den Ament schaffen 12 Beamten an der Jugendschutzsektioun bei der Police Judiciaire. Een Drëttel vun hinne schafft donieft nach op Fäll vu Kannerpornographie. Dem Claude Weis no missten op d'mannst véier Beamte just an dësem Beräich schaffen. Dat wier och an der Police-Reform virgesinn, déi den Ament um Instanzewee ass. D'Zil wier et, fir net just op Meldunge kënnen ze reagéieren, mee och aktiv am Internet Kannerpornographie kënnen ze bekämpfen.

Ee laangwierege Prozess

D'Missioun vun der Jugendschutz-Sektioun bei der Police Judiciaire wier et erauszefannen, ob eng Persoun, déi kannerpornographescht Material besëtzt oder um Internet opgeruff huet, sech och selwer un engem Mannerjärege vergraff huet. Dofir misst een dacks bei engem Täter Millioune Bild-Material duerchkucken. Dat wier trotz de Computerprogrammer op déi d'Beamten zeréck gräifen, ee laangwierege Prozess. Et géif een do u seng Limitte kommen, seet de Claude Weis. Et misst ee sech d'Fro stellen, ob een all d'Fotoe géif ukucken, oder just d'Halschent. Et géif ee riskéieren, eppes Wichteges ze verpassen, oder souguer verpassen, e Kand an Nout ze retten.

Am Ausland géife Policebeamten dacks wéinst der Belaaschtung net méi wéi fënnef Joer op Fäll vu Kannerpornographie schaffen, esou nach de Claude Weis.

D'Françoise Keller am Panorama de 24. Abrëll um 7 Auer:

Lauschteren