Staatsfinanzen a Klimaschutz Accisen um Sprit kéinten ëm 1-2 Cent klammen

Dem Pierre Gramegna no wier et noutwendeg, datt manner hei getankt gëtt, fir datt Lëtzebuerg seng Klimaziler erreecht. "Wa mir dat net hikréien, musse mir Emissioune kafe goen", sou de Pierre Gramegna. Et wier wéineg sënnvoll, Suen, déi ee mam Bensin verdéngt, nees auszeginn, well ee wéinst deem Bensinsverkaf seng Klimaziler net erreecht.

Et wier méi intelligent an et géif ee méi fir d'Klima maachen, wann een d'Accisen erop géif setzen, "Mir sinn eis do eens, datt dat eng kohärent Politik ass." Déi Sue sollen an ee Spezialfong fléissen, dee klimafrëndlech Projete soll finanzéieren.

De Budget beim Zentralstaat fir 2018 ass am Equiliber, confirméiert de Pierre Gramegna. Weider huet hie präziséiert, datt de Fonds souverain, den Zukunftsfong mëttlerweil mat enger Véierels Milliard Euro gespeist gouf.

Wéi gëtt d'Individualbesteierung finanzéiert?

De Finanzminister huet och Explikatioune ginn iwwer déi "déifgräifend" Reform vum Lëtzebuerger Steiersystem, déi am Koalitiounsaccord virgesinn ass, fir déi een awer e bëssen Zäit bräicht. D'Regierung wëllt d'Steierklasse jo ofschafen an d'Leit individuell besteieren. De Pierre Gramegna preziséiert, datt d'Steiersituatioun vun de Leit net méi dovunner géif ofhänken, ob se gescheet, bestuet, gepacst, celibataire sinn, oder ob de Partner gestuerwen ass.

Bei der Virstellung vum Koalitiounsaccord gouf ënnerstrach, datt duerch dës Steierreform keen eppes verléiere soll. De fréieren Direkter vun der Steierverwaltung Guy Heintz huet sech d'Fro gestallt, wéi dat finanziell kéint gestäipt ginn. De Pierre Gramegna ass am gaangen, "dat alles ze kucken":

"An et muss een Transitiounsperiode virgesinn. Et muss een och Rechnung droe fir Leit, déi Kanner à charge hunn, dass dat och mat erafléisst ouni Steierklassen ze maach, mee dat kann een op vill Aart a weise maachen. Et ass wierklech ze fréi, fir schonn do iwwer Modalitéiten ze schwätzen, mee ech fannen, et soll een ëmmer optimistesch an d'Liewe kucken. Aner Länner hunn dat fäerdeg bruecht, also muss et machbar sinn."

Chamberwahlen 2018: "E komescht Gefill"

2018 waren déi éischt Chamberwahlen, déi de Pierre Gramegna matgemaach huet. 2013 war hien zwar an d'Regierung komm, war awer kee Kandidat. D'Wahlcampagne wier komesch gewiescht fir de Pierre Gramegna, an hie misst sech dodru gewinnen. "Et muss een de Leit jo soen, datt ee selwer gutt ass. An dat ass e bëssen e komescht Gefill. Ech soe léiwer: d'Regierung schafft gutt oder d'Partei huet do eng gutt Propositioun gemaach."

D'Leit géifen awer froen "Wat hutt Dir da gemaach? Firwat soll ech fir Iech stëmmen?" Do misst een äntweren, datt ee selwer eng gutt Aarbecht geleescht huet, an datt ee frou wier, wann d'Leit fir ee géife stëmmen. "Et ass also eppes, wat net esou evident ass."