Tanktourismus Accisen um Sprit: Decisioun iwwer méiglech Erhéijung Enn dës Joers
D'Regierung wëllt bis Enn des Joers eng Decisioun huelen, ob d'Accisen um Bensin an um Diesel nach eng Kéier erhéicht ginn, seet de Mobilitéitsminister François Bausch.
Viru véier Méint goufen d'Sprit-Accise schonn ëm ee, respektiv zwee Cent gehéicht. Am Dezember wéilt d'Regierung analyséieren, wéi een Impakt dës Mesure hat, esou de François Bausch. Hie seet, wa sech géif erausstellen, datt den Tanktourismus net konnt "ofgebremst" ginn, da misst d'Regierung "nach eng Kéier eng Schëpp noleeën".
"Dofir ware mir eis eens an der Regierung direkt dogéint ze reagéieren, mat enger éischter Mesure. Dofir zéie mir jo bis Enn des Jores de Bilan. Sollt sech erausstellen, datt mir déi Tendenz net mindestens elo mol ofgebremst kréien, da musse mir mat Sécherheet nach eng Kéier eng Schëpp noleeën. Mee dat ass méi à court terme, fir datt déi Evolutioun eis net derapéiert."
Méi laangfristeg misst dann och nach iwwer aner Steiermesuren nogeduecht gi fir den CO2-Ausstouss ze limitéieren, esou de François Bausch. Dat soll am Kader vun der geplangter Steierreform geschéien. Weider Detailer nennt de grénge Minister am Moment nach net."
Méi zum Thema
Wéi eng Konsequenze fir den Tanktourismus an Ëmwelt?
D'Accisen op de Sprit solle gehéicht ginn. De Liter Bensin soll een Cent méi kaschten, den Diesel zwee Cent. Wéi eng Konsequenzen huet dat fir den Tanktourismus zu Lëtzebuerg a wat bedeit dat fir d'Ëmwelt?
D'Consommatioun vum Sprit drosselen
D'Regierung leet sech nach net fest, ob déi nächst Jore weider Erhéijunge vun den Accisen um Sprit néideg sinn. Um Enn vum Joer géif e Bilan gemaach ginn. Ob eng Hausse néideg ass, wier net virauszegesinn.
Zeechent sech d'Enn vum "Tanktourismus" of?
Zënter knapp zwee Joer geet de Verkaf vu Bensin an Diesel zu Lëtzebuerg liicht mee erkennbar zréck. Firwat? Lount sech fir "Tanktouristen" iwwerhaapt nach den Ëmwee iwwert de Grand-Duché ?
