Um Rendezvous-vous e Sonndeg wäert elo een däitsch-franséische Ministersommet nogeholl ginn, deen am Oktober ausgefall war. De Grond dofir ware Meenungsverschiddenheeten tëschent Berlin a Paräis, déi elo gekläert solle gi fir ze probéieren dëser joerzéngtelaanger Frëndschaft en neien Elan ze ginn.
Den 60. Anniversaire vum Elysée-Traité ass een Datum mat vill Symbolkraaft an déi brauch et den Ament och tëscht Frankräich an Däitschland. D'Tensiounen dominéieren d'Relatiounen tëschent béide Länner - grad elo, wou d'EU groussen Erausfuerderungen ausgesat ass. De Frank Baasner vum Deutsch-Französichen Insitut erhofft sech, datt besonnesch bei zwee Sujeten eng gemeinsam Linn ka fonnt ginn. Wirtschaftspolitesch bräicht et eng europäesch Äntwert op den amerikaneschen Inflation Reduction Act, doniewent misst et och an der Verdeedegungspolitik, zum Beispill bei de Waffeliwwerunge méi Zesummenaarbecht ginn.
Frankräich féiert, Däitschland zéckt
Besonnesch bei der Verdeedegungspolitik hätt et zwar schonn ëmmer Desaccorden tëschent Berlin a Paräis ginn, seet och den Politologe Gilbert Casasus, mee grad elo mam Krich an der Ukrain géing sech weisen, datt et keng gemeinsam Strategie méi géif ginn. Dobäi hätte béid Länner duerchaus gemeinsam Nenner hei, déi et ze fanne gëllt, sou de Politolog.
Anescht ewéi fréier, wier Frankräich haut déi Natioun, déi europäesch Projete géif undreiwen, wärend Däitschland zéckt, fënnt den Gilbert Casasus.
Egal ob bei dem däitschen "Doppelwumms" an der Energiepolitik oder de franséische Panzerliwwerungen un d'Ukrain - ze dacks goufen déi däitsch-franséisch Relatiounen a leschter Zäit vun nationalen Interessen dominéiert, seet de Frank Baasner. Dofir wier et wichteg d'europäesch Partner nees méi staark matzedenken.
Vill Gespréichsstoff
D'Tensiounen déi sech doraus erginn hunn, kéint een net ignoréieren, seet de Frank Baasner, mee et misst een aus dëse Lektiounen zéien. Hien ass optimistesch, datt dëse Mindset och nees do ass.
Et dierft deemno e Sonndeg vill Gespréichsstoff tëschent béide Regierunge ginn.
An Zesummenaarbecht mat Euranet Plus, dem gréissten europäesche Radio-Reseau fir EU-Aktualitéit.
