Neie Prisong zu Suessem Thomas Galli: Vill Prisonge kéinten zougemaach ginn
Den neie Prisong fir 400 Prisonéier zu Suessem wier net néideg gewiescht. Där Meenung ass den däitschen Affekot, Buchauteur a fréiere Prisongsdirekter a Sachsen Thomas Galli. Wéinst den zousätzleche Plaze géifen d'Geriichter an d'Parquete Verdächteger am Zweiwelsfall éischter an dëse Prisong stiechen a sech keng Gedanken iwwert Alternative maachen, esou seng Kritik.
Negativ um Lëtzebuerger System wier déi héich Zuel un Untersuchungsprisonnéier an déi laang Dauer vun der Untersuchungshaft, seet den Expert Thomas Galli. Hien ass der Meenung, datt vill Prisonge kéinten zougemaach ginn. Et géif awer net dorëm goen, d'Prisongen ouni Alternativ vun haut op muer ofzeschafen. Et géif schonn Iddien a Méiglechkeete fir alternativ Weeër ginn, wéi zum Beispill Foussfesselen oder Aarbecht fir d'Allgemengheet. Fir dës Alternative méi oft z'applizéiere bräichten d'Politiker awer vill Courage, seet den Thomas Galli.
"Vor allem müsste es ihm oder ihr tatsächlich um die Sache gehen. Man dürfe nicht darauf schielen, das nächste Mal widergewählt zu werden, sondern man muss wirklich auch was riskéieren."
Den neie Prisong zu Suessem war am Dezember d'lescht Joer offiziell opgaangen. De Bau hat iwwer 170 Milliounen Euro kascht. Den Thomas Galli mengt, datt dëse Bau éischter Deel vun enger geféierlecher Entwécklung gewiescht wier. Sou laang et esou vill Platzen an Untersuchungshaft gëtt, géifen sech de Parquet keng Gedanken driwwer maachen, ob eng Alternativ duergaange wier.
De Mëttwoch Owend hält de fréiere Prisongsdirekter Thomas Galli zu Dummeldeng eng Konferenz iwwer de Sënn vu Prisongen.
An der Mediathéik:
LauschterenMéi zum Thema
Uerschterhaff: Plaz fir 400 Prisonéier an Untersuchungshaft
Den neie Prisong zu Suessem ass op, e gouf vum Grand-Duc Henri ageweit. Um Uerschterhaff ass Plaz fir 400 Prisonéier an Untersuchungshaft. Doduerch gi Capacitéiten zu Schraasseg fräi.
Neie Prisong: Eng 250 Prisonéier plënneren op Suessem
Zu Suessem gëtt en neie Prisong ageweit. Eng 250 Prisonéier sollen an den nächste Woche vu Schraasseg dohi geplënnert ginn. Mëtt Mäerz wier d'Plënneraktioun ofgeschloss, seet de Serge Legil.
Serge Legil: Klima am Prisong ass "relativ rau"
Am Prisong wier am Moment eng "ganz ugespaanten Atmosphär", seet de Serge Legil, Direkter vun der Prisongsverwaltung. De Prisong wier mat 640 Leit staark iwwerbeluecht an d'Temperature wiere relativ héich.
No Incident an der Unisec: Ze fréi fir Conclusiounen ze zéien
Frust an eng komplex Gruppendynamik hätten zur Rebellioun vu Jugendlechen dëse Weekend an der Sécherheetsunitéit fir Mannerjäreger gefouert, mengt den Direkter vum Centre-Socio-Educatif zu Dräibuer.
