13 recommendatioune goufen ugeholl Eng besser Gestioun vum Filmfong

Am ganzen 13 Recommandatiounen huet d'Budgetskontrollkommissioun ugeholl, fir d'Gestioun vum Lëtzebuerger Filmfong ze verbesseren. No engem Rapport vum Rechnungshaff gouf et eng Rei Diskussiounen iwwer d'Positioun vum Direkter an iwwer administrativ Onreegelméissegkeete beim Filmfong. Ënnert anerem soll de finanzielle Pouvoir vum Direkter elo ageschränkt ginn.

Sophie Schroeder / jod

Guy Daleiden
Den Direkter vum Lëtzebuerger Filmfong, Guy Daleiden. (Foto: Archiv)

Iwwerdeems sollen och d'Ausgaben am Zesummenhang mat Reese besser dokumentéiert a kontrolléiert ginn, an d'Subsiden, déi de Filmfong verdeelt, solle méi konkret definéiert ginn. Dës Recommandatioune wieren dem Vizepresident vun der Budgetskontrollkommissioun Dan Kersch no noutwenneg.

"Et kann een net nëmmen eng oder zwou Recommandatiounen hei realiséieren, well dann huet een net vill geschafft. Et muss een de ganze Fonctionnement op de Leescht huelen. An alle Beräicher muss nogebessert ginn. Wann dat net geschitt, dann ass et en onkomplett Gesetz."

Administrativ Prozedure si schonn ugepasst

Den Direkter vum Lëtzebuerger Filmfong Guy Daleiden weist sech averstanen domat, datt dës Verbesserungsvirschléi de richtege Wee sinn. Dofir wier de gréissten Deel vun de Recommandatiounen och schonn ëmgesat ginn.

Sou hätt een ënnert anerem schonn all administrativ Prozeduren ugepasst. Fir de Filmfong wier dat ni eng Diskussioun gewiescht, präziséiert de Guy Daleiden.

"Ech mengen, de Budget vum Fong gëtt jo all Joers vun externe Kontrolleure gekuckt, an do ginn och all Joers Recommandatioune gemaach, wat ee ka besser maachen. Mir hu gesot mir géifen déi ëmmer alleguer ëmsetzen, dat hu mir gemaach. Dofir erschéngt dat mir nëmmen normal, datt wann ee proposéiert kritt, fir besser ze ginn, datt een dat soll maachen an dat hu mir jo lo och heimat bewisen."

Upassung bei der Personalstruktur feelt nach

Een Aspekt, deen awer nach net konnt ugepasst ginn, wier d'Personalstruktur. Déi éischt Recommandatioun vun der Budgetskontrollkommissioun fuerdert, datt de Filmfong sech un d'Organisatiounsgesetzer vun aneren ëffentlechen Etablissementer upasst.

Ouni eng Modifikatioun vum Gesetz vun 2014 kéint een dëse Punkt awer net ëmsetzen, seet de Guy Daleiden. D'Budgetskontrollkommissioun hofft dofir, datt hir Recommandatiounen an eng Gesetzesännerung mat afléissen, sou nach den Dan Kersch.

Net verpassen

Programm

Dossieren

  • Gemengewalen 2023

    Den 11. Juni gëtt an de verschiddene Gemenge vum Land en neie Gemengerot gewielt. Wéi eng Sujete dominéieren d'Wal a wéi verleeft de Walkampf an de vereenzelte Gemengen?

  • Chamberwalen 2023

    Den 8. Oktober gëtt zu Lëtzebuerg en neit Parlament gewielt. Kann d'Dräierkoalitioun vun der DP, LSAP an déi gréng weider d'Regierung stellen, oder gëtt et ee Regierungswiessel?

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen