Verkéiersaccidenter 2019 goufen et manner Verkéiersdoudeger

22 Mënschen hunn 2019 hiert Liewen op de Lëtzebuerger Stroosse verluer: dat ass een historesch niddregen Niveau. De Mobilitéitsminister François Bausch huet vun enger "gudder Nouvelle" geschwat. D'Association nationale des victimes de la route hofft, datt et an den nächste Jore bei méi enger niddreger Zuel vu Verkéiersdoudege bleift.

Serge Kesseler / cbi

Den nei Ambulanze vum CGDIS
2019 goufen et 22 Verkéiersdoudeger. Foto: CGDIS (Archiv)

De Bäitrag vum Serge Kesseler lauschteren


De François Bausch huet am 100,7-Interview vun enger "gudder Nouvelle" geschwat: et geséich een, datt den Aktiounsplang fir Verkéierssécherheet - mat och repressive Mesurë - kloer seng Wierkung géif weisen. Dem Mobilitéitsminister no géif et een Zil bleiwe fir d'Zuel vun de Verkéiersdoudege weider ze reduzéieren, d'Tendenz géif awer an eng gutt Richtung goen.

De François Bausch ënnersträicht, datt een nach net op der gewonnener Säit wier. "Dat ass esou bei der Verkéierssécherheet, do muss ee permanent hannendru bleiwen." D'Zil wier et fir eng Reduktioun vu 50 Prozent vu Verkéiersdoudeger ze komme par rapport zu 2000. "Dann dierfte mer bis Enn 2020 net iwwer 19 Doudeger kommen", esou de Mobilitéitsminister.

Vision zero

Datt een 2019 no un dëst Zil eru komm wier géif weisen, datt een Duerchgräife Wierkung hätt, betount de François Bausch. Dat anert grouss Zil wier nach ëmmer d'Vision zero mat kengem Doudesaffer op de Stroosse méi, erkläert de Minister.

Bis dohi wier et awer nach ee wäite Wee, gëtt de François Bausch ze bedenken. "Do musse mer weiderfuere mat verschiddene Mesuren, déi éischter repressiv sinn." Als Beispill nennt de Mobilitéitsminister de Rout-Luuchte-Radar, deen dëst Joer nach komme soll.

Donieft missten dem Mobilitéitsminister no Mesurë geholl gi fir d'Stroossen nei ze designen, fir méi Sécherheet fir d'Vëlosfuerer a fir d'Foussgänger ze erreechen. Dat soll ënner anerem iwwer Vitessreduktiounen, 30er Zonen a Shared space erreecht ginn, déi an Zukunft eng gréisser Roll géife spillen.

Wéi vill Leit goufe schwéier blesséiert?

Den AVR-President Raymond Schintgen mengt, datt een um richtege Wee wier, wat d'Mesuren uginn. D'Association nationale des victimes de la route hofft, datt et an den nächste Jore bei méi enger niddreger Zuel vu Verkéiersdoudege bleift, "net datt mer d'nächst Joer erëm eng Iwwerraschung kréien".


De Bäitrag vum Serge Kesseler lauschteren


Fir de Raymond Schintgen stellt sech awer d'Fro vun de Schwéierblesséierten: "Do sinn ech awer nach gespaant, wat d'Resultat wäert ginn. Ech mengen dat wäert awer erschreckend sinn, dat ass dat, wat eis nach ganz grouss Suerge mécht."

Radaren: Ee positiven Impakt

Als ee Grond fir manner Verkéiersdoudeger d'lescht Joer nennt de President vun der AVR d'Radaren. Et hätt sech bei de Leit ronderëm geschwat, datt et kee Sënn méi géif maache fir séier ze fueren a sech net un d'Vitessen ze halen. Dat géif och déi Leit bestätegen, déi dës Mesuren als richteg gesinn hunn, an net déi, déi gemengt hunn, dat wier just fir d'Staatskeess ze fëllen.

Den AVR-President Raymond Schintgen bleift och bei senger Fuerderung vun null Promill am Stroosseverkéier.

2018 louch d'Zuel vun de Schwéierblesséierte bei iwwer 270. Dee komplette Bilan vun de Verkéiersaccidenter vun 2019 wëllt de Ministère am Mee presentéieren.

Méi zum Thema

Roud Luuchten
Verkéierssécherheet

Wien duerch rout fiert, kéint an Zukunft op d'mannst op dräi Plazen am Land geblëtzt ginn: Nieft der Stäreplaz an um Schlammestee, kéint och bei der Hollerecher Kierch esou ee Radar installéiert ginn.

Eng Strooss ouni Leitplanken
Verkéierssécherheet

D'Assocation des victimes de la route huet eng Partie Fuerderungen opgestallt, wat geschéie muss, fir d'Stroosse méi sécher ze maachen, a fir datt manner Leit stierwen oder blesséiert ginn.

Programm

Praktesch Infoen

  • Nei Serie: Wellbeing

    Wellbeing

    Bleift gesond a monter zesumme mam 100,7. An eiser neier Serie "Wellbeing" wëlle mir Iech an dësen Zäite mat wäertvollen Informatiounen a Rotschléi begleeden. 

Dossieren

  • Coronavirus

    Den neiaartege Coronavirus Sars-CoV-2 breet sech ëmmer méi aus. De Virus léist d'Krankheet COVID-19 aus. Wéi eng Mesurë gi geholl, a wéi een Impakt huet en op Lëtzebuerg?

  • Gratis ëffentlechen Transport

    Den ëffentlechen Transport zu Lëtzebuerg ass vum 29. Februar u gratis. Dat haten d'Majoritéitsparteien Enn 2018 esou decidéiert. An eisem Dossier fannt Dir all eis Artikelen zum Theema.

Iwwert eis

De radio 100,7 ass deen eenzegen ëffentlech-rechtleche Radio zu Lëtzebuerg. E proposéiert Programmer op Lëtzebuergesch mat engem Fokus op Informatioun, Kultur, Divertissement a mat Akzent op d’klassesch Musek.

Weider liesen