D’Regierung denkt driwwer no fir e Militärspidol hei am Land opzemaachen. An esou enger Struktur kéinten nieft Zaldoten och Réfugiéë behandelt ginn, esou d’Gesondheetsministesch am 100,7-Interview. De Projet fir e Militär-Spidol stécht nach an der Ufanks-Phas. Et géif awer elo gepréift ginn, ob et méiglech ass, e Militär-Departement an aner Spideeler déi et scho gëtt, z’integréieren. Zum Beispill kéint den Zenter fir héich-ustiechend Krankheeten am CHL op déi Manéier ausgebaut ginn, esou d’Lydia Mutsch.
Flüchtlingen, déi hei am Land ukommen, kréien automatesch e Rendez-vous fir e Gesondheetscheck. Am Moment géingen eng 20 Flüchtlingen pro Dag ënnersicht ginn, esou d’Lydia Mutsch. Eng hallef Dose Leit këmmeren sech am Moment ëm déi medizinesch Betreiung vun de Flüchtlingen – dorënner Dokteren, Psychologen an Infirmieren. Bei de jonken Flüchtlingen gëtt virun allem psychologesch Betreiung gebraucht: 40 Prozent vun de Kanner a Jugendlechen déi ukommen, hätten nämlech traumatesch Erliefnisser hannert sech, zum Beispill duerch den Doud vu Famillje-Memberen.
