Fräie Mikro

Dënschdes an Donneschdes um 8.50 an 12.15 radio 100,7

All Dënschdeg an Donneschdeg kommentéieren verschidden Acteuren aus der Zivilgesellschaft d'Aktualitéit. D'Meenungen déi hei expriméiert ginn, engagéieren nëmmen hir Auteuren. De radio 100.7 huet awer als Editeur d'editorial Responsabilitéit vun dëse Bäiträg.

Zoumaachen!

29. Sep 2015 - 08:50

Zoumaachen ass d’Wuert vun der Zäit! D’Grenzen, d’Dieren, d’Gaardepaarten an d’Häerzer. Zoumaache well d’Auslänner komme fir vun eisem Wuelstand ze profitéieren! Si huelen eis Bauplazen, eis Aarbechtsplazen, eis Meedercher! Si beaflossen eis Liewensweis, si imposéieren hier Sprooch, hier Kultur an hier Religioun. Déi, déi beim Comptoir stinn, héieren dëst all Dag. Mee net just um Comptoir, leider och op Plaze wou een sech e bësse méi Niveau erwaarde géif. An natierlech och a Parteien. Et ka wierklech net wäit hir si mat eiser Kultur wann e puer dausend Flüchtlingen se a Gefor bréngen.

De Moment fir des Propaganda ass ideal. D’Leit hunn net méi vill Vertrauen an d’Politik, well déi et net hikréien de wëlle Kapitalismus ze stoppe wou Räicher skandaléis räich ginn, an Aarmer ëmmer méi aarm. Dozou kommen nach e puer Skandaler vu Gefuddels, Hannerzéie vun ëffentlechem Gelder an natierlech esou e katastrofaalt Krisemanagement wéi zum Beispill a Griicheland. Mir fillen eis bedrot well mer och net sécher sinn op des Politiker eis Fräiheete verteidege kennen.

Onzefridde Leit deenen et verhältnisméisseg gutt geet, manipuléiert vu populistesche Politiker déi keng Léisungen unzebidden hunn a just mat den Emotioune vun de Léit spillen, regéieren d’Welt. A kee seet, datt dat Faschismus ass. Et kuckt een dem Ganzen no an et fillt en sech schlecht.

E fräie Mikro vum Danielle Igniti:

Lauschteren

Rezent Emissiounen

• Wien gleewt nach un den europäeschen Demokratie-Modell?

  15. Okt 2015 - 08:50

  De Problem vum Hung a vum Ee begéint Politik – oder en anere Bléck op eis europäesch Wirklechkeet. Dozou e fräie Mikro vum Jean-Luc Thill.

• Wéini gëtt et eis ze bont?

  13. Okt 2015 - 08:50

  Am fräie Mikro vun haut stellt d'Anne Heniqui d'Fro wéi vill Faarf eis Gesellschaft kann erdroen bis et hier ze bont gëtt. 

• Plaidoyer fir méi Authentizitéit

  08. Okt 2015 - 08:50

  De Marco Thomé beschäftegt sech mat der „political correctness“ am Kontext vu rezenten Skandaler. An hien hält e Plädoyer fir méi Authentizitéit an Éierlechkeet an eiser Gesellschaft.

• Nodenken amplaz ofrappen!

  06. Okt 2015 - 08:50

  D'lescht Woch hunn d'Amicale des hauts fourneaux an de Mouvement écologique un d'Wichtegkeet vun der Erhalung vun de Gebléis- an Dynamogebaier souwéi de Gas- a Wandleitungen um Belvaler Héichuewesite erënnert. Dozou e fräie Mikro vum Denis Scuto.

• Stellvertriederkricher a Flüchtlingsnout

  01. Okt 2015 - 08:50

  Hannert der Flüchtlingsnout aus No-Ost, hannert der Emergenz vu kriminelle Gottesstaaten verstoppe sech Stellvertriederkricher vun de Groussen, mengt a sengem fräie Mikro de Journalist Romain Goerend.

• Zoumaachen!

  29. Sep 2015 - 08:50

  Zu Lëtzebuerg an an Europa kréie Populisten, déi net vill ze bidden hunn ausser ophetzen géint Auslänner, ëmmer méi nogelauschtert. Danielle Igniti fäert, datt dat an eng ganz geféierlech Richtung geet.  

• D'Fro nom "richtege Liewen"

  24. Sep 2015 - 08:50

  D'Flüchtlingen, déi an Europa kommen, konfrontéieren eis mat der Fro nom richtege Liewen. Doriwwer denkt de Jean-Luc Thill no. 

• Stacheldrot an Tréinegas am Europa vun der Opklärung

  22. Sep 2015 - 08:50

  Wat geschitt mat Europa? Net nuren mat der EU, mä och mat der Wäertegemeinschaft, déi aus der Opklärung hier kënnt? E puer Iwwerleeunge vum Simone Beck.  

• Verännerungen vun der Gesellschaft

  17. Sep 2015 - 08:50

  Verännerungen an der Gesellschaft - Verännerunge vun der Gesellschaft. En nodenkleche Commentaire iwwert d’Evolutioun vun der Gesellschaft zu Lëtzebuerg vum Nadine Ewerling.