De Guy Feyder vun der Bauerenzentral a seng Lëscht kruten zwar déi meeschte Stëmme bei der Wal vun der Landwirtschaftskammer, mee net genuch fir eng absolut Majoritéit vun de Mandater ze erreechen.
Christian Hahn: Zesummen un engem Strang zéien
An de leschten Deeg ware sech d’Gewielte vun deenen zwou anere Lëschten driwwer eens gi fir de Christian Hahn als President ze wielen. Doropshin hat de Guy Feyder, President vu bis elo, seng Kandidatur fir de Comité zréckgezunn.
Trotzdeem soll een zesummen un engem Strang zéien, betount den neie President Christian Hahn.
Dat war och de Wëlle vun der Baueregewerkschaft „Zesumme méi staark“, déi d’Kandidatur vum Christian Hahn mat ënnerstëtzt hat. „Aktiv Bauere fir eng staark Landwirtschaft“ an d’Lëscht „zesumme méi staark“ hate genuch Stëmmen zesumme fir d’Wal vum Comité ze bestëmmen.
"Méi no un de Bauer"
Vize-President vun der Landwirtschaftskammer gëtt de Paul Funck vun de Wënzer. Member vum Comité sinn d’Nora Feyder, vun der Bauerenzentral an de Jean-Paul Vosman vun „Zesumme méi staark“. Kooptéiert ass de Conny van de Sluis deen d’Gäertner vertrëtt.
Et war deem neie President och wichteg datt d’Landwirtschaftskammer méi no bei de Bauer kënnt.
„Méi no un de Bauer heescht, datt ee Kommissiounen oder Aarbechtsgruppe mécht, wou een d'Leit mat ranhëlt. Deen, dee sech wëll engagéieren, muss sech kënne matengagéieren, datt een an den Decisiounen, déi een hëlt, dee breet méiglechste Konsens huet. An, do muss een eeben da Kompromësser fannen. Den Text gëtt héchstens méi staark, wat méi Leit wäerten dru matschaffen.“
Guy Feyder traureg mee net iwwerrascht
De Guy Feyder, President vun der Landwirtschaftskammer vu bis elo, war nom Vott e wéineg traureg, mee et hätt een a Virgespréicher scho gespuert, datt dat esou géing kommen.
„Mir hunn also probéiert erauszefannen, wat ass eng Basisbefindlechkeet vun der Ronn, déi gewielt ginn ass, fir datt een erkennt, jo, wat sinn d'Zeeche vun der Zäit. An ech mengen, et huet sech relativ séier erausgeschielt, datt eng staark Demande do ass, fir eng Verjéngung vun de Reien, virzehuelen. Et huet een iwwregens an de Walresultater eppes Änleches konnte feststellen.“
Alles an Allem wäert et mat där neier Zesummesetzung dozou kommen, datt eng nei Generatioun un d’Rudder kënnt. De Wëllen zesummenzeschaffen ass jiddefalls do.