Et sollen an Zukunft och finanziell Ënnerstëtzunge gi bei Déngschtleeschtungen, wéi der Wäsch wäschen, fir Hygiènesproduiten a Fernseh, Telefon an Internet. Iwwerdeems soll dat sougenannte “Täschegeld” liicht gehéicht ginn.
Fraen éischter vun Altersaarmut betraff
Zu Lëtzebuerg sinn 11 Prozent vun de Leit iwwer 65 Joer dem Aarmutsrisiko ausgesat. Dobäi si Frae méi heefeg betraff wéi Männer. Eng alarméierend Erkenntnis, seet d’CSV-Deputéiert Nathalie Morgenthaler.
“Laut dem Statec läit den Aarmutsrisiko bei den Elengerzéier bei 44 %. Gläichzäiteg gi bal 90 % vun de monoparentalle Famille vun enger Fra gefouert. Wa vill vun den elengerzéiende Mammen haut schonn d'Enner um Enn vum Mount nëmmen nach mat knapper Nout zesummekréien, dann ass d'Altersaarmut a ville Fäll virprogramméiert. An dat däerf einfach net sinn.”
Den DP-Familljeminister Max Hahn huet iwwerdeems betount, datt ee bis Enn dës Joers eng digital Plattform wéilt hunn, bei deem ee seng Composition de ménage kann uginn an dann alleguer d’Aiden ugewise kritt, déi een ze gutt hätt.
Iwwerdeems soll bis Enn dës Joers en nationalen Aktiounsplang géint d’Aarmut op d’Bee virgestallt ginn, esou nach de Max Hahn.
