D‘Relatioun tëscht den USA a Südkorea ass ugespaant, ënnert anerem wéinst den US-Taxen, an der Festnam an den USA vu südkoreanesche Fabricksaarbechter.
Wuel keng Entrevue tëschent Trump an Kim Jong-un
Den amerikanesche President Donald Trump war an de Moiestonne a Südkorea ukomm. Nëmmen e puer Stonne virdrun hat Nordkorea ballistesch Rakéite getest. Den Trump sot, hie wéilt och den nordkoreanesche Leader Kim Jong-un begéinen. Den Ament ginn et awer kéng Indikatiounen, datt et zu engem Treffe wäert kommen.
Treffe mat Xi Jinping
Am Virfeld vum Treffe muer mam chineesesche President Xi Jinping – um Bord vum APEC Sommet a Südkorea – huet den Donald Trump sech iwwerdeems optimistesch gewisen. Hie géif sech een „exzellent Treffen“ erwaarden, an datt vill Problemer geléist kéinte ginn, esou den US-President.
Dat léisst d‘Hoffnung opkommen op eng eventuell Léisung am Handelskrich tëscht China an den USA. China huet dat geplangt Treffen iwwerdeems och elo confirméiert. Wouriwwer geschwat wäert ginn, huet de chineeseschen Ausseministère awer net gesot.
