De President Vucic geheit den Demonstranten “rengen Terrorismus” vir. D’Leit géife mat Hëllef vum Weste probéieren d’Land ze destabiliséieren. Beweiser fir seng Behaaptunge nennt de President dobäi net.Regierungskritiker geheien him iwwerdeems vir, fir déi Gewaltausbréch zoustänneg ze sinn. Si soen, hie géif selwer d’Attacken op Protestbeweegungen orchestréieren.
D’Lescht Woch hu Supporter vun der Regierungspartei Demonstrante mat Matraquen attackéiert. D’Police stoung niewendrun an hat net agegraff, heescht et aus Medieberichter. Dat hätt zur Eskalatioun vun de Protester an ville Stied gefouert. Op de soziale Reseaue courséiere Videoen, déi weisen, wéi Sécherheetskräfte mat Matraquen op Demonstrante schloen, déi um Buedem leien.
Kritiker geheien der Vucic-Regierung Korruptioun vir
Mat juristesche Konsequenze mussen d’Poliziste wuel net rechnen, fäerten Observateuren. 130 Poliziste wiere bis Sonndeg verletzt ginn, sot de Vucic a senger Usprooch op der Tëlee. Offiziell Donnéën zu verletzen Demonstranten an Demonstrantinne gëtt et keng.
Zënter 10 Méint protestéiere Regierungskritiker géint den Aleksander Vucic a seng Regierung. Ausléiser war den Daach vun enger Gare zu Novi Sad, deen den 1. November zejoert agestierzt war. Dobäi war deen Daach frësch renovéiert – 16 Mënsche waren ëm d’Liewe komm. Onofhängeg Experten an d’Oppostition maachen d’Korruptioun vun der Vucic-Regierung dofir verantwortlech. Regierungskritiker geheien der Regierung iwwerdeems een autoritäre Féierungsstil vir a fuerdere virgezunnen Neiwalen.
