Zesumme mat senger Fra huet hie sech der US-Justiz misse stellen. Bei dëser éischter Auditioun huet den 63 Joer alen ofgesatene President op net schëlleg plädéiert an erkläert, hie wär nach ëmmer de President vu sengem Land.
Virworf vun Terrorismus an Drogenhandel
Op verschiddenen US-Tëleeschaînen ass den ofgesate President an Handschellen a mat Eskort ze gesinn. Washington gehäit dem Nicolás Maduro Terrorismus an Zesummenhang mam Drogenhandel vir.
Interimspresidentin bereet ze kooperéieren
Déi venezuelanesch Interimspresidentin Delcy Rodríguez weist sech bereet zu enger Kooperatioun mat den USA. Dat, nodeems den Donald Trump si gewarnt huet. Wa si dat net richteg mécht, misst si warscheinlech nach méi een héije Präis bezuelen, wéi den Nicolás Maduro, esou den Donald Trump. D'Interimspresidentin Delcy Rodriguez soll haut um Méindeg vereedegt ginn.
An engem Message op Instagram schreift si, déi venezuelanesch Regierung géif déi amerikanesch Regierung opruffen zesummen un enger Kooperatiouns-Agenda am Kader vum Vëlkerrecht ze schaffen.
All EU-Länner ausser Ungarn reagéieren op d'Attack
Den UNO-Sécherheetsrot soll e Méindeg de Mëtteg um 4 Auer eiser Zäit fir eng urgent Sëtzung op Demande vu Venezuela zesummekommen.
Iwwerdeems huet d‘EU-Aussebeoptraagt Kaja Kallas eng schrëftlech Deklaratioun am Numm vun der EU op de soziale Reseaue publizéiert. Si insistéiert doran op d‘Recht vum venezuelanesche Vollek selwer iwwer seng Zukunft ze decidéieren. Hir Deklaratioun gouf vun allen EU-Länner, ausser Ungarn, ënnerschriwwen.
Och kubanesch Sécherheetsforcen ëmbruecht
Déi kubanesch Regierung gouf iwwerdeems bekannt, datt bei der Attack vun den USA op Venezuela 32 Membere vun de kubanesche Sécherheetsforcen ëm d‘Liewe komm wieren.