D'Republikaner hunn op Drock vum designéierten US President Donald Trump a senger neier Vertrauenspersoun Elon Musk dee schonn ausgehandelte Budgetsentworf ofgeleent.
Am Budget waren iwwert 100 Milliarden US-Dollar fir d'Katastrophenhëllef ënnert anerem fir déi betraffe Gebitter vum Hurrikan Milton an Helena virgesinn. Niewent den däitlech reduzéierten Ausgaben haten d’Republikaner an hirem neien Entworf och een Aussetze vum Plaffong vun de Staatsscholde bis 2027 gefuerdert.
Demokrate kritiséieren den Afloss vum Elon Musk
Demokraten argumentéieren, datt den Donald Trump sou säin ugekënnegte Steierplang finanzéiere wëll. D’Roll vum Tech-Millardär Elon Musk an dëser Affär gouf vun den Demokraten och schaarf kritiséiert. Si schwätze vum "Poppespiller” an “President Musk”. Den Tech-Millardär soll an der Trump Regierung bei der Kierzung vun de Regierungsausgaben hëllefen. Dat hat den Donald Trump schonn am November ugekënnegt.
Wann et net geléngt bis hënt um Mëtternuecht Lokalzäit een Accord ze fannen, ginn d'Regierungsgeschäfter op Äis geluecht. Iwwer 100.000 Staatsbeamte géifen dann an de Congé sans solde geschéckt ginn.
Wärend dem Donald Trump senger éischter Amtszäit war et ëm de Joreswiessel 2018-19 schonn zum längste Shutdown vun der amerikanescher Geschichte komm. 5 Woche war ee sech hei net eens ginn iwwert déi geplangten US-Grenzmauer zu Mexiko.