Den Thierry Breton hat den "Digital Services Act" vun der EU fir d‘Regulatioun vun Online-Plattformen op de Wee bruecht.
Den US-Ausseministère huet den Thierry Breton elo op eng Lëscht vu Persoune gesat, déi kee Visa méi accordéiert kréien. D‘US-Regierung beschreift dës Persounen als "radikal Aktivisten", déi probéiere géifen amerikanesch Online-Plattformen ze zenséieren an amerikanesch Meenungen ze ënnerdrécken.
Areesverbuet och fir däitsch Aktivistinnen
Den Thierry Breton schwätzt vun enger Hexejuegd. Hie vergläicht d‘Virgoe vun der Trump-Regierung mat der Verfollgung vu presuméierte Kommunisten an de 1950er Joren ënner dem US-republikanesche Politiker Joseph McCarthy.
Och betraff vum Areesverbuet sinn ënner anerem d‘Anna-Lena von Hodenberg a Josephine Ballon vun der däitscher Organisatioun HateAid. Déi setzt sech géint Haass a Gewalt am Internet an.
Europäesch Reaktioun
Déi souverän Stëmm vun den europäesche Bierger:inne kann duerch keng Sanktioun roueg gestallt ginn: Esou huet den EU-Kommissär Stéphane Séjourné haut um Mëttwoch op déi amerikanesch Areesverbueter reagéiert.
