Op Uerder vum Donald Trump goufe bis elo schonn Dausenden Zaldote vun der Nationalgard op Washington a Los Angeles geschéckt
Zu Los Angeles war den Asaz vun der Nationalgard awer illegal. Dat huet e Riichter a Kalifornie geurteelt.
Eng 4.000 Zaldote waren op Uerder vum President op Los Angeles geschéckt ginn, fir d'Protester ze berouegen, déi ausgebrach si wéinst de Razziae vun der Immigratiounsagence ICE géint Migranten.
De Staat Kalifornien hat dogéint geklot. De Riichter huet festgehal, datt d'Zaldote vun der Nationalgard Tâchen erfëllt hunn, déi fir Member vum Militär verbuede sinn. Seng Decisioun trëtt eréischt d'nächst Woch a Kraaft. D'Regierung huet bis dohin Zäit fir en eventuellen Appell.
