Déi spuenesch Regierung geet domat op eng Biergerinitiativ an, déi zejoert 700.000 Ënnerschrëfte gesammelt huet. Domat gouf se vum Parlament iwwerpréift. Zënter Jore ass dëst eng Fuerderung aus der Wirtschaft, virop dem Bau an der Landwirtschaft. An deene Secteure besteet ee grousse Manktem un Aarbechtskräften, deen esou kann opgefaange ginn.
Accès zu ëffentlechen Déngschter a Gesondheetsservicer
Fir eligibel ze si fir dës Mesür, muss ee beweise kënnen, datt ee virum 31. Dezember zejoert wärend fënnef Méint a Spuenien gelieft hat an net virbestrooft ass.
D‘Regierung huet och eng acceleréiert Prozedur versprach, esou datt d‘Demandeure mam Erareeche vun hirer Demande, legal schaffen dierfen.
Gëtt hir Demande ugeholl, kréie si eng Openthaltsgeneemegung vun engem Joer, déi awer verlängert ka ginn. Dëst erlaabt et de Leit, legal ze schaffen, awer och den Accès zu ëffentlechen Déngschter, notamment an de Gesondheetsberäich.
Regierung reagéiert op Fuerderung vun de Lénken
Et ass net déi éischte Kéier, datt eng spuenesch Regierung esou eng Mesure ergräift. Déi spuenesch Ekonomie hänkt nämlech staark vun der Awanderung of.
Et ass awer och eng Fuerderung vun de Lénken, vun deenen d‘Regierung fir hir Stabilitéit ofhängeg ass. Déi ass dës Lescht an d‘Schwanke geroden, well de spuenesche Premier Pedro Sanchez, wéinst Geriichtsaffäre géint seng Famill, an eng Rei Skandaler involvéiert war.
Déi riets Vollekspartei (Partido Popular) geheit dem Premier dowéinst och vir, mat dëser Annonce vun de Skandaler oflenken ze wëllen.