Déi Späicherstrategie leet virun allem fest wéi Batterien an dat aktuellt Stroumnetz kënnen agebaut ginn a wéi se fir Industrie a Bierger:innen interessant kënne gemaach ginn.
Dozou gehéieren zum Beispill och Primme fir nogebaute Batterië fir Photovoltaikanlagen. Detailer gi réischt muer um Mëttwoch virun der Press virgestallt, nodeems d’Deputéiert de Moien en Abléck an déi nei Strategie kruten. Et wéilt een an där Strategie e Kader setzen, sot de Wirtschaftsminister Lex Delles (DP) de Moien no der Entrevue mat den Deputéiert. Et wéilt ee esouwuel individuell Batterien ewéi och Batterië fir e ganze Quartier.
“Mir kucke wéi Batterien nëtzlech kënne sinn.”
De Stroumreseau entlaaschten
Mat Batterië kéint ee Stroumspëtzten aus dem Reseau eraushuelen.
Batterië sollen dem Lëtzebuerger Stroumreseau also hëllefen, datt en net esou séier weider misst ausgebaut ginn. Et wéilt een déi erneierbar Energien zu Lëtzebuerg weiderhi bis 2030 op 37 Prozent bréngen, esou wéi et am nationale Klimaplang PNEC steet, esou nach de Lex Delles.
Am Hierscht soll e Grupp de Suivi eng éischte Kéier zesumme kommen, fir un der Ëmsetzung vun der Batterie-Strategie ze schaffen.
