D'Gewerkschaften OGBL an LCGB hätten d’Gespréicher an de bis dato zwou Sozialronnen monopoliséiert, heescht et vum Patronatsvertrieder Michel Reckinger. Viru kuerzem hat RTL verschidden intern Diskussiounspunkten aus de Sozialronne verëffentlecht. Déi verëffentlecht Propose géifen éischter vu Gewerkschaftssäit aus kommen, esou de Michel Reckinger. Allgemeng weist sech de Patronatsvertrieder frustréiert mam Oflaf vun de Sozialronnen.
Frust vum Patronat wier CSV-DP Regierung zouzeschreiwen
Wéi och schonn déi gréng Deputéiert Sam Tanson fënnt och de Sozialist Mars Di Bartolomeo, datt de Frust vum Patronat der CSV-DP Regierung zouzeschreiwe wier. Den Deputéierte seet a sengen Aen, géif déi hefteg Reaktioun vum Patronat doduerch kommen, datt d'Regierung dem Patronat eesäiteg Versprieche gemaach huet an net dermat gerechent hätt, datt d'Gewerkschaftssäit eppes dogéint huet.
Fir d’Sam Tanson wier déi Onzefriddenheet och doduerch bedéngt, datt Regierung onpreparéiert an d'Verhandlunge gaange wier. Wei et schengt wieren an deene Verhandlungen Proposen op den Dësch geluecht ginn, déi mol nach net ausgerechent gi war, esou déi gréng Deputéiert.
"Well eigentlech hätt een sech jo kéinten erwaarden, d'Positioune vun deenen engen an deen anere ware jo ganz kloer.”
Weider gëllt vu béiden Oppositiounsvertrieder de Virworf, datt d’Regierung der Chamber keen Abléck an d’Verhandlunge wëll erlaben. Fir d’DP-Deputéiert Corinne Cahen géif dëst awer Sënn maachen. Si kéint verstoen, datt et wichteg wier datt een den Ament keng konkreet Informatiounen un d’Ëffentlechkeet weidergëtt, ffir d'Verhandlunge weider féieren ze kënnen.
Berechnungen iwwert de Summer
Op eis Nofro hin, verweist de Staatsministère drop, datt iwwert de Summer eng Partie Berechnunge gemaache solle ginn. D’Virschléi vu bis elo wieren awer nach net schrëftlech formuléiert an un d’Sozialpartner geschéckt ginn, esou de Luc Frieden.
