Aus medezinesche Grënn wier ee vun de Riichter op onbestëmmt Zäit verhënnert. Den 18. an de 25. Mäerz d’nächst Joer gëtt den zweete Prozess domat nees nei opgerullt: D’Justiz huet déi entspriechend 100,7-Informatioune confirméiert.
Ufank Mee war den Appellprozess ëm d’medial Couverture, duerch RTL, vun engem Interview mam Enrico Lunghi u sech op en Enn komm. An där Affär geet et jo ëm en Interview vun Telé Lëtzebuerg, dat d’Sophie Schram am September 2016 mam deemolege Mudam-Direkter gemaach hat. Dobäi hat deen ee Moment, ausser sech, de Mikro vun der Journalistin ewechgeschloen a si mam Aarm geholl. An der Suite dovun hat RTL de Virworf gemaach kritt, e Reportage doriwwer wier manipuléiert gewiescht.
