Vun haut un ass eng lokal Police an der Haaptstad an zu Esch ënnerwee. Den neien Dispositif gouf de Moien der Press virgestallt a soll als Pilotprojet wärend 6 Méint lafen. D'Gemengepolice soll als „gudden Noper“ vun de Bierger:inne gesi ginn, betount den Inneminister Léon Gloden.
"Déi Police locale gëtt och méi visibel, éischtens duerch dee Bandeau. Zweetens ginn se och op strateegesche Plaze stationéiert, wou se dann och patrulléieren, sief et zu Fouss, mam Auto oder mam Vëlo."
Z‘erkenne sinn d‘Patrouillen un engem bloe Bändche mat der Opschrëft „Police locale“ ronderëm den Aarm. 20 Beamten a Beamtinnen an der Gemeng Lëtzebuerg a 4 an der Südgemeng sollen dofir suergen, datt déi ëffentlech Uerdnung agehale gëtt.
D‘Patrulle wäerte vu Méindes bis Samschdes, vu 7 Auer moies bis 9 Auer owes, a jee no Besoin och Sonndes. ënnerwee sinn.
D’Gemengeresponsabel vun den zwou Gemenge sollen sech reegelméisseg mat hirer jeeweileger Regionaldirektioun vun der Police kuerzschléissen, fir d‘Situatioun um Terrain auszewäerten an eventuell z‘ajustéieren. No 6 Méint, Enn des Joers, wäert dann de Bilan vun dësem Pilotprojet gemaach ginn, fir en eventuell och an anere Gemenge kënnen z’applizéieren.
Iwwerdeems betount de Léon Gloden, datt dee Projet d'Gemengen näischt kaschte wäert. Dat géif alles iwwer de Policebudget respektiv de Staatsbudget lafen.