Ee Laangfilm a fënnef Virtual Reality Filmer goufen an d'Selektioun vum Internationale Film Festival Mostra de Venise opgeholl. Mat dobäi si Koproduktioune vun de lëtzebuergesche Filmboîtte Skill Lab, Les Filmes Fauves, Digital Voodooh a BAHN.
Lëtzebuerg schafft reegelméisseg mat internationale Produktiounsfirmen a Realisateuren a Realisatricen zesummen - wéi notamment mam chineesesche Regisseur Wang Bing. Säi Film Youth "Homecoming" ass an der Laangfilm-Kompetitioun dobäi an huet zu Venedeg seng Weltpremière.
Kontakter knäppen a Finanzéierungen ustoussen
Nieft dem Filmfestival ass vum 29. August bis den 3. September d'Venise Production Bridge. Dës Plattform fir den internationale Filmmarché bitt d'Méiglechkeet fir mat neie Reseauen zesummenzekommen a zukünfteg international Kollaboratiounen unzestoussen. Den Direkter vum Lëtzebuerger Filmfong Guy Daleiden ass mat enger Delegatioun do present, fir déi national Filmindustrie ze stäerken.
"A Gott sei Dank, hu mer dëst Joer och parallel nach esou vill Oeuvren. Esou datt ech géif mengen, datt Lëtzebuerg dëst Joer d’Chance huet fir esou grouss zu Venedeg erauszekommen (…) esou present war Lëtzebuerg nach ni."
Als Ënnerstëtzung fir déi lëtzebuergesch Filmindustrie sinn de Grand-Duc an d'Grande-Duchesse mam DP-Kulturminister Eric Thill fir Visitten dëse Weekend op der Plaz.
De Filmfestival leeft nach bis de 7. September zu Venedeg.