Lass geet et haut um Mëttwoch mat enger Etapp iwwer 153 Kilometer vun der Stad zeréck an d’Stad. Dat mat engem zolitten Ëmwee wäit erop an den Norden, wou och zu Pëtscht, Buerschent an Eschduerf dräi gëfteg Montéeë fir d’Coureuren ze bewältege sinn.
Traditionell Schlussetapp markéiert de Schluss
Am Géigesaz zu der Etapp vun haut ass déi vu muer, Donneschdeg, vu Réimech op Mamer éischter flaach, an no 168 Kilometer wéi gemaach fir Sprinter.
E Freideg steet dann d’Kinneksetapp um Programm: Vu Mäertert geet et bis op Veianen, mat enger spektakulärer Arrivée am Haff vum Veianer Schlass.
Bei engem Tour dierf e Contre la montre natierlech och net feelen. Op deem éischter flaache Parcours iwwer 26 Kilometer mat Depart an Arrivée zu Nidderaanwen misst um Enn e Spezialist an deem Exercice sech duerchsetzen.
E Sonndeg steet dann nach déi traditionell Schlussetapp vu Miersch op de Lampertsbierg um Programm.
International Vedettë stinn um Depart
Als Favoritten di sech dëst Joer virun allem den Ir Ben Healy, dee beim Tour de France op sech opmierksam gemaach huet, an de Gewënner vum Tour de Luxembourg 2023 Marc Hirschi, ervir. Aner Prominent Nimm, déi dobäi sinn, sinn de Kolumbianer Richard Carapaz oder den Nils Politt aus Däitschland.
Den Tour de Luxembourg kann ee wéi gewinnt laanscht d’Stroosse suivéieren an natierlech och op der Televisioun. Och eng Rei un internationalen Tëleeschaînë wäerten den Tour de Luxembourg dëst Joer iwwerdroen.
