Am Ganze ginn am neie Gebai 9.000 Tonne Stol verschafft. 95 Prozent dovun ass sougenannte XCarbStool, deen an den ArcelorMittal-Wierker zu Esch an Déifferdeng produzéiert gëtt, mat engem däitlech manner héije Carbon Impakt wei traditionell Stolbalken.
D’Gebai vun 22 Stäck gëtt 79 Meter héich. Et gouf vum internationalen Architekte-Büro “Wilmotte et Associés” entworf.
Den Zäitplang an de Budget géifen agehale ginn, mat engem Baupräis vu ronn 4.000 Euro pro Meterkaree, sot den ArcelorMittal exekutive Vize-President, Vijay Goyal. E Gesamtmontant, wéi vill d‘Gebai kaschte wäert, huet hien awer net genannt.
D‘Hallschent vum Gebai, wou 2.600 Leit solle schaffen, keeft de Lëtzebuerger Staat. E Montant vun 273,5 Milliounen Euro waren dofir an engem Gesetz 2023 festgehale ginn.
De Staat wëllt am Gebai eventuell d‘Ponts et Chaussées, transports publics an de Service des aides au logement ënnerbréngen. Wat genee geplangt ass, ass awer nach net gewosst.
