D’Politikerin gëtt ausgezeechent, als Leaderin vun den demokratesche Forcen a Venezuela, huet et de Moie vum Nobelcomité zu Oslo geheescht. Ervirgehuewe gouf der María Corina Machado fir hiren Asaz fir déi demokratesch Rechter vum Vollek a Venezuela.
Si hätt d’Flam vun der Demokratie an enger däischterer Zäit brenne gelooss, esou d’Aschätzung vun der Jury.
Déi venezuelanesch Oppositiounsleaderin Machado gëllt als Géignerin vum autoritäre President Nicolás Maduro.
(Foto: epa/RODRIGO FREITAS)
De Friddensnobelpräis 2025 geet also net un den US-President Donald Trump.
D’lescht Joer war déi japanesch Friddensorganisatioun Nihon Hydankyo mam Friddensnobelpräis ausgezeechent ginn: dat fir hire Kampf fir eng Welt ouni Atomwaffen.
