Eng Statutenännerung soll elo dofir suergen, datt et ni méi esou wäit ka kommen. Et misst een ewech komme vun der Ee-Mann-Partei, betount de Marc Goergen. Dee Prozess hätt och scho virum Dossier MALT ugefaangen, fir anere Kandidatinnen a Kandidate méi Visibilitéit ze ginn.
"Dat heescht d'Parteileedung soll méi flaach organiséiert ginn, wou vill méi Leit kënnen eng Verantwortung droen. Dat ass an sech de Grondprojet vun deene Statuten."
De Piratendeputéierte Marc Goergen vergläicht d‘Affär MALT mat der Gaardenhaischenaffär vun de Gréngen. Déi gréng wieren dobäi awer méi konsequent mam Dossier ëmgaangen.
Verglach mat Gaardenhaischen Affär
Et kéint och keen dem Sven Clement d‘Decisioun ofhuelen, wéi vill Verantwortung hien iwwerhëlt. Bei der Gaardenhaischenaffär war et deemools och zu Récktrëtter komm. Erwaart de Marc Georgen sech déi selwecht Konsequenz?
„Also sollt sech erausstellen, datt deemools bewosst Bedruch war, dann ass et sécherlech kloer, dass do e Récktrëtt herno am Raum wäert stoen.“
Et wier elo un der Justiz, deen Dossier ze analyséieren, betount de Marc Goergen.