An senger Requête hat den Affekot vum Ex-Mataarbechter, den Alex Penning, ënner anerem argumentéiert, datt de Mataarbechter wéinst senger Denonciatioun vun engem Fall vu Mobbing entlooss gouf. D’Riichterin huet an hirer Ordonnance awer zeréckbehalen, datt de Mataarbechter dee Lien net konnt beweisen.
Kee Jugement quand au fond
De fréiere Mataarbechter muss iwwerdeems der Gemeng Conter eng Indemnitéit vun 2.500 Euro bezuelen, grad ewéi d’Geriichtskäschten iwwerhuelen. Den Affekot Alex Penning wäert géint déi Decisioun an Appell goen.
"Mir maachen op jidde Fall Appell géint déi Ordonnanz do, a mir maachen och le moment venu parallel dann och eng Affär um Fong, wou mir dann op Schuedenersatz kloen, an och engersäits wéinst dem Licenciement, an anerersäits wéinst dem Mobbing."
Déi Ordonnance ass awer kee Jugement quand au fond - dat heescht, wou et ëm d'Entloossung u sech geet. Deemno wéi et am Appell ausgeet, wéilt den Affekot an enger weiderer Etapp d’Aarbechtsgeriicht saiséiere fir iwwer d’Entloossung u sech ze jugéieren.
D'Buergermeeschtech vu Conter, d'Marion Zovilé-Braquet, huet sech erliichtert gewisen.
"Ech mengen, et ass eng ganz grouss Erliichterung, net nëmme fir mech selwer, fir de Schäfferot, mee och fir all eis Mataarbechter, datt dat Urteel esou ausgaangen ass."