D’Fraktioun vun den Europäesche Konservativen a Reformer (EKR) brauch nach méi Zäit, bis eng Decisioun iwwer d’Memberschaft vum Lëtzebuerger ADR-Europadeputéierte Fernand Kartheiser ka geholl ginn.
Dat sot de Chef vun där Fraktioun, de Nicola Procaccini, um Dënschdeg op eis Nofro hinn zu Stroossbuerg. Et wier een den Ament "mat villen anere Prioritéiten an Erausfuerderunge konfrontéiert”, sou den Italieener.
D’EKR-Fraktioun hätt hirem Lëtzebuerger Member gesot, datt seng Aussoen iwwer Russland net richteg gewiescht wieren.
Diskussioun op Partei-Niveau
D’Decisioun awer, wéi et virugeet, wier méi eng, déi éischter um Niveau vun der Partei, wéi vun der Fraktioun vun den “Europäesche Konservativen a Reformer” misst geholl ginn, huet den Nicola Procaccini preziséiert. An do bräicht een nach méi Zäit, fir driwwer ze diskutéieren.
Am Februar hat de Fraktiounschef gesot, et wéilt ee genee wëssen, wou d'Lëtzebuerger Partei ADR steet, déi Member an der EKR ass. Den Nicola Procaccini hat och gesot, d'Fraktioun wéilt esou séier wéi méiglech eng Decisioun huelen, wéi mam Fernand Kartheiser soll viru verfuer ginn.
Virdrun hat et Kritik um Lëtzebuerger ADR-Europadeputéierten aus den eegene Reie ginn.
