D‘Wiss um Fussballsterrain, wou sech alles ofgespillt huet, war plätschnaass. De Wand huet d’Barrièren ëmgehäit, an et huet riicht era gereent.
Eng Stonn virum Grand-Duc senger geplangter Arrivée war d‘Gréiwemaacher Buergermeeschtesch Monique Hermes drop an drun, alles ofzesoen. Mee dunn huet d‘Wieder sech e bësse berouegt.
“Mir hunn e bësselchen ëm geplangt, datt mir d'Atelieren, déi mir maachen, méi no bäigeholl hunn, datt een net muss de ganzen Zäiten iwwert d'Grass lafen, mee et kann definitiv alles gemaach ginn ewéi geplangt.”
Déi jonk Sportler:innen hunn net laang gezéckt fir dem neie Staatschef ze weise, wat se kënnen – vertruede ware Clibb am Handball, an der Liichtathletik, am Dëschtennis an am Fussball.
Spektakulär war och den Optrëtt vum Gréiwemaacher „Red Lions“ Taekwondo.
Ee grousse Moment
Och de Publikum op där iwwerdaachter, dréchener, Tribün war houfreg, datt Gréiwemaacher déi éischt Etapp vum Grand-Duc senger Tournée war.
“C‘est un honneur effectivement. C 'est sympa qu‘il vient ici, effectivement.”
Net alles ass zu Gréiwemaacher komplett no Plang ofgelaf. Zum Schluss huet de Grand-Duc improviséiert. de Guillaume ass bei d‘Leit, déi laanscht d‘Gelänner stounge gaangen, fir Moien ze soen.
Mat vill Applaus goung domat zu Gréiwemaacher déi éischt Etapp vum Grand-Duc Guillaume senger Tournée duerch d‘Land op en Enn.
