Et wier een oppe fir een Dialog, esou de Jens Frederik Nielssen. Diskussiounen géifen si awer just iwwer déi offiziell Weër an am Respekt vum internationale Recht duerchféieren, huet de grönnlännesche Premierminister betount.
An engem Interview mam amerikanesche Magasinn The Atlantic sot den Trump, Venezuela wier méiglecherweis net dat lescht Land, an deem d'USA intervenéieren. D‘USA géifen och Grönland onbedéngt brauchen, esou den Donald Trump.
Dës Ausso gouf vun Dänemark, Schweden, Norwegen a Finnland verurteelt. Déi dänesch Regierungscheffin Mette Frederiksen sot, d‘USA hätten absolut kee Recht, en Deel vun der dänescher Staategemeinschaft ze annektéieren.
EU-Diplomatie reagéiert
No der US-Interventioun a Venezuela erwaart sech d’Europäesch Unioun vu senge Partner, an dësem Fall de Vereenegte Staten, datt si d’Integritéit vun engem Territoire unerkennen. Zu dëser Ausso vun enger Spriecherin vun der EU-Diplomatie kënnt et no Menacë vum US-President Donald Trump géintiwwer Grönland. Déi riseg Insel am Nordatlantik huet de Status vun engem autonomen Territoire vun Dänemark.
