2021 war d’Uelzecht op iwwer 4 Meter geklommen. Ee grousse Problem wier awer nach ëmmer de Val de Hamm, wou et och dës Kéier nees vill Schued duerch dat villt Waasser gouf, esou haut d’Buergermeeschterin Lydie Polfer.
“Dat ass een natierlechen Opfangbecken, dee Val de Hamm. Mir mussen dofir och eng Léisung mat deene Leit fannen, déi do sinn. Dat hate mir hinne schonn e puermol proposéiert. Bis elo hu mir do keen Accord fonnt. Ech mengen, dës Kéier fanne mir een. Well och mat all anere Moyenen, aneren Opfangbecken uewendriwwer, dat wier mat deene Massen, déi hei komm sinn, net duer gaang, fir awer do ze verhënneren, datt do dee Schued géif entstoen.”
Am Total hat de CGDIS an der Stad Lëtzebuerg wärend dem Staarkreen d’lescht Woch 89 Asätz: 79 dovu wéinst dem Waasser an 10 wéinst Beem, déi ëmgefall waren.
Leit, deenen hir Saachen an der Garage wéinst Iwwerschwemmungen esou beschiedegt goufen, datt se se musse wechgeheien, kënne sech bei der Stad Lëtzebuerg mellen, fir datt d’Saache kënnen ofgeholl ginn, esou d’Lydie Polfer.
