Den däitschen Ausseminister Johann Wadephul (CDU) huet um Méindeg de Moien am Interview um Deutschlandfunk drop higewisen, datt den Nicolás Maduro un der Spëtzt vun engem “Onrechtsregime” a Venezuela gestanen hätt.
De Maduro wier net de rechtméisseg gewielte President vum Land gewiescht. Mee och geopolitesch Interesse vun den USA hätte bei der US-Attack a Venezuela eng Roll gespillt, esou den däitsche Chefdiplomat.
China mellt sech zu Wuert
Et géif dorëm goen, datt déi riseg Pëtrols-Reserve vu Venezuela net weider ënner der Kontroll vu Géigner vun den USA stéingen, huet den amerikaneschen Ausseminister Marco Rubio um Sender CBS erkläert.
D’Zil wiere politesch Changementer a Venezuela. Wéinst senge Pëtrols-Importer ass China ee wichtege Partner vum südamerikanesche Land.
D’Festhuele vum Maduro duerch d’USA suergt deemno fir Kritik a China. Kee Land dierft Weltpolizist spillen, an et géif een net acceptéieren, datt ee Land sech als Weltriichter opspillt, esou de chineeseschen Ausseminister Wang Yi, ouni awer d’USA direkt ze nennen. D’Vëlkerrecht soll d’Souveränitéit an d’Sécherheet vun allen Natioune schützen, esou de Chefdiplomat zu Peking.
D’USA haten an der Nuecht op ee Samschdeg Ziler a Venezuela attackéiert. Den Nicolás Maduro war op New York bruecht ginn, wou him wéinst Drogendelikter de Prozess soll gemaach ginn.
